EntertainmentPosted at: Mar 8 2026 8:41AM

کے آصف: وہ ہدایتکار جس نے ہندوستانی سنیما کو شاہکار دیا

9مارچ برسی کے موقع پر
ممبئی،8 مارچ (یو این آئی) بالی ووڈ میں فلم ساز کے آصف کو جن کا پورا نام آصف کریم تھا , بالی ووڈ کی دنیا میں ایک معروف فلمی ہستی کے طور پر یاد کیا جاتا هےجنهوں نے تین دہائیوں پر محیط اپنے فلمی کیریئر میں اپنی فلموں کے ذریعے فلم بینوں کے دلوں پر انمٹ نقوش چھوڑے۔

کے آصف کا فلمی کیریر بظاہر تین چار فلموں تک ہی محدود ہے لیکن ان کے اندر کام کرنے کا جو جذبہ تھا وہ اتنی شدت سے ابھرکر سامنے آتا تھا کہ فلم بینوں کے دلوں پر نقش ہو جاتا تھا۔
وہ اپنے کام کو بے نقص رکھنے میں اس قدر استغراق سے کام لیتے تھے کہ اکثر ان پر سست رفتاری کا الزام بھی لگتا رہا جس کی انہوں نے کبھی پروا نہیں کی اور جب بھی ان کی فلم پردہ سیمیں کی زینت بنی تو ایک عہد کو متاثر کر گئی۔

کے آصف نے 14 جون 1922 کو اترپردیش کے اٹاوہ میں ایک درمیانے طبقے کے مسلم خاندان میں آنکھیں کھولیں۔
چاليس کی دہائی میں وہ اپنے ماموں جان نذیر کے پاس ممبئی آ گئے جہاں ان کی درزی کی دکان تھی۔
ان کے ماموں فلموں میں ملبوسات سپلائی کیا کرتے تھے۔
ساتھ ہی انہوں نے چھوٹے بجٹ کی ایك دو فلمیں بھی بنائیں۔
اس طرح کے آصف ماموں کا ہاتھ بٹانے لگے ۔
انہیں اپنے ماموں کے ساتھ فلم اسٹوڈیو جانے کا موقع ملنے لگا ۔
آہستہ آہستہ ان میں بھی فلموں سے دلچسپی بڑھتی گئی۔

کے آصف سليم اور اناركلی کی محبت کی کہانی سے کافی متاثر تھے ۔
فلموں سے دلچسپی بڑھنے پر وہ اس کہانی کو پردہ سیمیں پر لانے کا خواب دیکھنے لگے۔
1945 میں بطور ڈائریکٹر انہوں نے فلم پھول سے اپنے فلمی کیریئر کا آغاز کیا۔
پرتھوی راج کپور، ثریا اور درگا کھوٹے جیسے بڑے ستاروں والی یہ فلم باکس آفس پر سپر ہٹ ثابت ہوئی۔

اس فلم کی کامیابی کے بعد کے آصف نے اپنے خواب کو شرمندہ تعبیر کرنے کی ہمت پیدا کی اور ’’مغل اعظم‘‘ بنانے کا فیصلہ کیا۔
ابتدا میں انہوں نے شہزادہ سلیم کے کردار کےلئے چندر موہن کو اور انارکلی کے کردار کے لئے اداکارہ ویتا کے علاوہ اکبر کے کردار کے لیے سپرو کا انتخاب کیا۔

کرداروں کے انتخاب کا مرحلہ آسان نہ تھا ۔
کے آصف کو کافی دقتوں کا سامنا کرنا پڑا۔
ایک مرحلے پر شہزادہ سلیم کے کردار کے لئے انہوں نے اداکار سپرو کا انتخاب کیا اور اکبر کے کردار کے لئےچندر موہن کے سامنے تجویز پیش کی لیکن چندر موہن نے ان سےصاف لفظوں میں یہ کہہ دياکہ وہ اس فلم میں اسی شرط پر کام کریں گے جب وہ اس فلم کی ہدایت کی ذمہ داری وہ خود نہ اٹھائیں۔
اس پر کے آصف نے انہیں یہ جواب دیا تھا کہ وہ اس دن کا انتظار کریں گے جب ان (چندر موہن) کو ان (کے آصف) کی صورت پسند آنے لگے ۔
ا كبر کے کردار کے لئے کے آصف نے چندر موہن کو اس لئے منتخب کیاتھا کیونکہ ان کی آنکھ بھی اداکار سپرو کی طرح نیلی تھیں۔

اداکار چندر موہن کی 1946 بے وقت موت ہو گئی۔
اس کے بعد کے آصف نے سپرو کے سامنے اکبر کا کردار ادا کرنے کی تجویز پیش کی اور انارکلی کے کردار کے لیے نرگس اور سلیم کے کردار کے لئے دلیپ کمار کو منتخب کیا لیکن سپرو جو نرگس کے ساتھ فلموں میں بطور اداکار کام کر چکے تھے، اکبر کا کردار نبھانے سے انکار کر دیا۔
بعد میں اداکارہ نرگس نے بھی فلم میں کام کرنے سے انکار کر دیا۔
تب مدھوبالا کے سامنے انار کلی کا کردار ادا کرنے کی تجویز پیش کی گئی اور اکبر کے کردار کے لئے پرتھوی راج کپور کو منتخب کیا گیا۔
اس طرح 1951میں ایک بار پھر مغل اعظم کی فلم سازی کا کام شروع ہوا۔

اسی دوران كےآصف نے دلیپ کمار نرگس اور بلراج ساہنی کے ساتھ فلم ہلچل شروع کی ،جو کامیاب ثابت ہوئی۔
اس فلم سے منسلک ایک دلچسپ حقیقت یہ ہے کہ ’اپٹا‘ سے وابستگی اور اپنے انقلابی اور کمیونسٹ خیالات کی وجہ بلراج ساہنی کو جیل بھی جانا پڑا۔
خصوصی انتظامات کے تحت وہ فلم کی شوٹنگ کیا کرتے تھے اور شوٹنگ ختم ہونے کے بعد وہ واپس جیل چلے جاتے تھے۔

فلم’’ مغل اعظم‘‘ بنانے میں تقریبا 10 سال کا وقت لگ گیا ۔
اس دوران سلیم انارکلی کی محبت کی کہانی پر بنی ایک اور فلم اناركلی پردہ سیمیں پر آکر سپر ہٹ بھی ہو گئی ۔
باوجودیکہ 1960 میں جب مغل اعظم منظر عام پر آئی تو اس نے باکس آفس کے سارے ریکارڈ توڑ دیئے۔

فلم کی موسیقی بے انتہا مقبول ہوئی۔
اس سے منسلک بھی ایک دلچسپ حقیقت یہ ہے کہ موسیقار نوشاد نے ایک لاکھ روپے ایڈوانس کی پیش کش کے باوجود اپنی مصروفیت کی وجہ سے اس فلم کی موسیقی ترتیب دینے سے انکار کر دیا تھا ۔

كےآصف ہر قیمت پر فلم میں نوشاد سے کام لینا چاہتے تھے۔
انہوں نے جب نوشاد کو کام کرنے کے لئے اور روپیوں کا لالچ دیا تو وہ پلٹ کر بولے کہ’’ کیا آپ یہ سمجھتے ہیں کہ پیسے سے ہر چیز خریدی جا سکتی ہے اور آپ ہر چیز خرید لیں گے۔
آپ اپنے پیسے واپس لیں میں فلم نہیں كروں گا‘‘۔
اس پر آصف صاحب نے چٹکی بجاتے ہوئے کہا ’’ دیکھتا ہوں کس طرح نہیں کریں گے ۔
اتنے پیسے دوں گا کہ آج تک کسی نے نہیں دیئے ہوں گے‘‘۔

اس کے بعد آصف نے جب اور پیسہ بڑھانے کے لئے اشارہ کیا تو نوشاد نے غصے میں آکر نوٹوں کا بنڈل اس طرح پھینکا کہ پورے کمرے میں نوٹ ہی نوٹ بکھر گئے۔
نوشاد کی بیوی اور نوکر نے سارے نوٹ اٹھالئے تو نوشاد نے کہا ’’ اچھا آصف صاحب، آپ اپنے پیسے اپنے پاس رکھ لیجئے ہم فلم میں ساتھ کام کریں گے‘‘۔

فلم مغل اعظم کی کامیابی کے بعد كےآصف نے راجندر کمار اور سائرہ بانو کے ساتھ’ سستا خون مہنگا پانی ‘ بنانی شروع کی لیکن کچھ دنوں کی شوٹنگ ہونے کے بعد انہوں نے اس فلم کو بند کر دیا اور گرودت اور نمی کے ساتھ لیلی مجنوں کی کہانی پر مبنی فلم ’محبت اور خدا‘ کی عکس بندی شروع کردی۔

گرو دت کی 1964 میں بے وقت موت کے بعد گرودت کی جگہ اداکار سنجیو کمار کو کام کرنے کا موقع دیا لیکن ان کا یہ خواب پورا نہ ہوسکا اور 9 مارچ 1971 کو دل کا دورہ پڑنے سے وہ اس دنیا سے رخصت ہوگئے۔
کے آصف کی اہلیہ اختر کی کوشش سے یہ فلم 1986 میں کسی طرح نامکمل ہی ریلیز کر دی گئی۔

یو این آئی۔
این یو۔

Entertainment

آشا بھونسلے: طویل کریئر، ہزاروں نغمے، خاندانی ورثہ اور مسلم سوشل فلموں میں مستند خدمات

گمراہ کن پوسٹ سے امن و امان کو خطرہ، دو سوشل میڈیا یوزرزپر ایف آئی آر

امبیڈکر کے مجسمے سے متعلق پروگرام کے دوران تنازعہ پر انتظامیہ سخت

آشا بھونسلے: طویل کریئر، ہزاروں نغمے، خاندانی ورثہ اور مسلم سوشل فلموں میں مستند خدمات

15 Apr 2026 | 4:59 PM

ممبئی،15اپریل ( یواین آئی) برصغیر کی نامور پلے بیک سنگر آشا بھونسلے کا شمار عالمی سطح پر اُن ممتاز گلوکاراؤں میں ہوتا ہے ،جنہوں نے نصف صدی سے زائد طویل کریئر میں ہزاروں نغمے گا کر ایک منفرد اور باوقار مقام حاصل کیا۔ مختلف مستند اندازوں کے مطابق انہوں نے بارہ ہزار سے زائد گانے ریکارڈ کیے، جب کہ بعض غیر رسمی دعوؤں میں یہ تعداد بیس ہزار سے بھی زیادہ بیان کی جاتی ہے۔ 1940 کی دہائی کے اواخر میں اپنے فنی سفر کا آغاز کرنے والی آشا بھونسلے آج بھی موسیقی کی دنیا میں ایک معتبر اور زندہ روایت کی حیثیت رکھتی ہیں۔ .