EntertainmentPosted at: Jul 17 2026 5:52PM

شہنشاہِ غزل مہدی حسن

(18جولائی یوم پیدائش کے موقع پر)
ممبئی،17جولائی (یو این آئی) مہدی حسن نے اردو غزلوں کو اپنی طلسماتی صدابندی کے ذریعے دنیائے موسیقی میں جو مقام عطا کیا‘وہ رہتی دنیا تک یاد کیا جائے گا۔
روح کو تازگی عطاکرنے والی ان کی آواز ہمیشہ زندہ و جاوید رہے گی۔

غزلوں کو نغمگی اوردوام بخشنے میں مہدی حسن کا کوئی ثانی نہیں۔
وہ ایسے فن کار تھے جن کی مترنم آواز‘ اسلوب اور موسیقی کی صداقت ہر خاص و عام پر اثر انداز ہوتی ہے۔
دنیائے غزل کے اس شہرہ آفاق گلوکارنے جتنی بھی غزلیں گائیں‘ وہ شاہکار بن گئیں۔
آج جب وہ اس دنیا میں نہیں رہے‘ دنیائے غزل میں ایک خلا پیدا ہوگیا۔
اردو غزلوں کو انہوں نے اپنی طلسماتی صدابندی کے ذریعے دنیائے موسیقی میں جو مقام عطا کیا‘وہ رہتی دنیا تک یاد کیا جائے گا۔
روح کو تازگی عطاکرنے والی ان کی آواز ہمیشہ زندہ و جاوید رہے گی۔
ابھی زیادہ دن نہیں ہوئے جب مخملی آواز کے جادوگر جگجیت سنگھ ہم سے جدا ہوئے تھے اور اب مہدی حسن کی جدائی نے غزل شائقین کونڈھال کردیا ہے۔

اٹھارہ جولائی1927کو ہندوستان کی ریاست راجستھان کے علاقے لونا میں پیدا ہونے والے مہدی حسن نے غزل گائیکی کا آغاز کمسنی سے کردیا تھا۔
انہوں نے آٹھ سال کی عمر میں پہلی بار موسیقی پروگرام پیش کرکے سامعین کو مسحور کردیا۔

تقسیم ہند کے وقت مہدی حسن بیس برس کے تھے۔
ان کا پورا خاندان پاکستان ہجرت کرگیا۔
ہجرت کے تمام مصائب ان کے ساتھ تھے۔
ان کے کنبہ کو شدید مالی دشواریوں کا سامنا کرنا پڑا۔
گزربسر اور پیٹ بھرنے کے لئے مہدی حسن نے ایک سائیکل کی دکان میں کام کرنا شروع کیا۔
بعد ازاں وہ کار اور ڈیژل ٹریکٹر کے مکینک بن گئے۔
تمام مشکلات کے بعد موسیقی کے تئیں ان کا جذبہ سرد نہیں پڑا۔
انہوں نے روزمرہ کا ریاض جاری رکھا۔

سال 1957میں مہدی حسن کو ریڈیو پاکستان پربطور ٹھمری گائک گانے کا موقع ملا۔
موسیقی برادری میں اس ٹھمری گائیکی نے مہدی حسن کو متعارف کرایا۔
وہ اردو شاعری کے بھی دلدادہ تھے۔
انہوں نے جزوقتی بنیاد پر غزل گائیکی شروع کردی۔
مہدی حسن کو اس وقت مقبولیت کی انتہاچھونے کا موقع ملا جب غزل گائیکی کے بڑے بڑے نام استاد برکت علی خان‘ بیگم اختر اور مختار بیگم کا سکہ چل رہا تھا۔
لیکن مہدی حسن اپنی محنت اور لگن سے ترقی کی منازل طے کرتے گئے اور آبروئے غزل بن گئے۔
غزل گائیکی میں ان کی شاندار خدمات کے عوض انہیں دنیا بھر میں متعدد انعامات سے نوازا گیا۔
حکومت پاکستان نے انہیں سب سے بڑے ایوارڈ ’ہلال امتیاز‘ سے نوازا۔
حکومت نیپال نے انہیں گورکھا دکشنا باہو کا ایوارڈ عطا کیا جب کہ ہندوستان میں انہیں’سہگل ایوارڈ‘ سے نوازاگیا۔

مہدی حسن کو موسیقی ورثہ میں ملی تھی۔
وہ خود کو کلونت گھرانے کی سولہویں نسل کہتے تھے۔
انہوں نے موسیقی کی ابتدائی تعلیم والدعظیم خان اورچچااسماعیل خان سے حاصل کی۔
ریڈیو پر ان کی پہلی مشہور غزل’’گلوں میں رنگ بھرے باد نو بہار چلے‘‘ تھی۔
فلمی گائیکی کی ابتدا فلم شکار سے کی۔
انہوں نے موسیقی کونئی سمت اور صنف غزل کو نئی بلندیوں پر پہنچایا۔
معروف شاعر احمد فراز کی غزل‘ اب کہ ہم بچھڑے تو شاید کبھی خوابوں میں ملیں‘/جس طرح سوکھے ہوئے پھول کتابوں میں ملیں‘ اور میر تقی میر کی غزل ’پتہ پتہ بوٹا بوٹا حال ہماراجانے ہے/جانے نہ جانے گل ہی نہ جانے‘ باغ تو سارا جانے ہے‘ کو مہدی حسن نے اپنی صدابندی کے ذریعہ بہت خوب صورت اور مترنم آواز میں لوگوں تک پہنچایا اور اس کے بعد تو لوگ ان کے دیوانے ہوگئے۔

مہدی حسن نے جس شاعر کی غزل گائی‘ وہ بہت مقبول ہوا۔
احمد فراز کو بھی ان کی گائی ہوئی غزلوں سے خوب شہرت ملی۔
ایک واقعہ ان کے تعلق سے بہت مشہور ہے۔
وہ یہ کہ احمدفراز دہلی سے بذریعہ ہوائی جہاز پاکستان جارہے تھے۔
ذاتی مصروفیت کی وجہ سے وہ ایئر پورٹ پر تاخیر سے پہنچے۔
سیکورٹی والے انہیں جانے کی اجازت نہیں دے رہے تھے۔
جب سیکورٹی والے نے ان کے پاسپورٹ کو بنظرغائر دیکھا تو اس نے پوچھا کیا آپ وہی ’’رنجش ہی سہی۔
۔
۔
‘‘ والے ہیں تو احمد فراز نے جواب دیا ’ہاں‘۔
پھر کیا تھا ساری رکاوٹیں دور ہوگئیں اور سیکورٹی والوں نے نہ صرف ان کو باعزت طریقے پر جانے دیا بلکہ ان کا سامان جو مقررہ وزن سے زیادہ تھا‘ فری میں جانے دیا۔
احمد فراز کی غزل بہت عمدہ ہے لیکن مہدی حسن نے اس کو اپنی آوازسے شہرت کی بلندیوں پر پہنچادیا اور ہر شخص اس کا دیوانہ ہوگیا۔

مہدی حسن اور لتامنگیشکر کا ڈواٹ گانا’تیرا ملنا‘تو لوگوں میں اس قدر مقبول ہوا کہ ہر خاص و عام کی زبان پر یہ گانا گنگنانے لگا۔
اس گانے کی خاص بات یہ تھی کہ دواٹ ہونے کے باوجود اسے مہدی حسن اور لتامنگیشکر نے الگ الگ وقتوں میں گایا۔
مہدی حسن نے 2009 میں اس گانے کو پاکستان میں ریکارڈ کرایاجب کہ ملکہ ترنم لتامنگیشکر نے 2010میں اسے ہندوستان میں ریکارڈ کرایا۔
بعد میں اسے ڈواٹ کی طرح بنایاگیا۔
اسے ’سرحدیں‘نامی البم میں جاری کیا گیا۔
کہا جاتاہے کہ یہ ان کا آخری نغمہ تھا۔

لتامنگیشکر نے مہدی حسن کے بارے میں کہا تھا کہ ان کے گلے میں بھگوان بولتا ہے اور نورجہاں نے جب مہدی حسن کو سنا تو وہ ان کی گرویدہ ہوگئیں اور کہنے لگیں کہ جو لوگ سر میں ہوتے ہیں‘ ان کے آباء و اجداد نے موتی دان کئے ہوں گے تبھی ان کے خاندان میں ایسا سریلا انسان پیدا ہوتا ہے۔
مہدی حسن ایسے ہی فن کار تھے جن پر جتنا بھی فخر کیا جائے کم ہے۔

مہدی حسن کے مشہور البموں میں کہنا ان سے‘ نذرانہ‘ انداز مستانہ‘ دل جو روتا ہے‘ کھلی جو آنکھ‘ صدائے عشق‘ سرحدیں‘ طرز اور نقش فریادی شامل ہیں۔

مہدی حسن کی جن غزلوں نے مقبولیت کی بلندیوں کو چھوا‘ ان میں آج تک یاد ہے وہ پیار کا منظر /آنکھوں سے ملی آنکھیں/پتہ پتہ بوٹا بوٹا حال ہمارا جانے ہے/رنجش ہی سہی دل کو دکھانے کے لئے آ/آئے کچھ ابر کچھ شراب آئے‘ اس کے بعد آئے جو عذاب آئے/اب کہ ہم بچھڑے تو شاید کبھی خوابوں میں ملیں/اے روشنیوں کے شہر/اپنوں نے غم دیا تو خدایاد آگیا/ بھولی بسری چند امیدیں/دل ناداں تجھے ہوا کیا ہے/چلتے ہو تو چمن کو چلئے/چراغ طور جلاؤ بڑا اندھیرا ہے/دیکھ تو دل کہ جاں سے اٹھتا ہے/رفتہ رفتہ وہ میری تسکیں کا ساماں ہوگئے/ اک خلش کو حاصل عمررواں رہنے دو/ اک ستم اور مری جاں‘ ابھی جاں باقی ہے/اک بار چلے آؤ پھر آکے چلے جانا/ آگے بڑھے نہ قصہ عشق بتاں سے ہم/تم مجھے بھلاتو رہے ہو ‘ بھلا نہ پاؤ گے‘ گلوں میں رنگ بھرے بادنو بہار چلے‘ دل میں طوفان چھپائے بیٹھا ہوں اور دنیا کسی کے پیار میں جنت سے کم نہیں وغیرہ شامل ہیں۔

مہدی حسن 13جون 2012کو طویل علالت کے بعد اس جہان فانی سے کوچ کرگئے۔
84سالہ مہدی حسن طویل عرصہ سے فالج کے عارضہ میں مبتلا تھے ۔
سانس لینے میں تکلیف کے سبب انہیں اسپتال میں داخل کرایا گیا تھا۔

مہدی حسن دنیائے موسیقی کا ایک ایسا باب ہے جو اب تاریخ کا حصہ بن چکا ہے۔
انہوں نے غزل گائیکی کو ایسا اسلوب عطاکیا جو کروڑوں لوگوں کے دلوں میں خوشبو کی طرح گھر کرگیا۔
ایسے فن کار صدیوں میں پیدا ہوتے ہیں۔
انہوں نے تین سو سے زائد فلموں میں بے شمار نغمے گائے۔
ان کی نغمگی میں ہر شخص ڈوب جاتا تھا۔
ان کی کمی رہتی دنیا تک محسوس کی جائے گی تاہم ان کی گائی ہوئی غزلیں ہمارے لئے بیش قیمت بہترین تحفہ ہیں جو ہمیشہ ان کی یاد دلاتی رہیں گی۔

یو این آئی۔
این یو۔

Entertainment

منیشا کوئرالا نے اپنی قدرتی خوبصورتی کے ساتھ ساتھ سنجیدہ اور جذباتی اداکاری سے الگ مقام بنایا

ڈیوڈ دھون: مزاحیہ، خاندانی اور تفریحی فلموں کے لیے مشہور

رنویر سنگھ کی نئی فلم ’پرلے‘ کی شوٹنگ شروع، دنیا کے خاتمے کی کہانی!

منیشا کوئرالا نے اپنی قدرتی خوبصورتی کے ساتھ ساتھ سنجیدہ اور جذباتی اداکاری سے الگ مقام بنایا

16 Aug 2026 | 3:37 PM

ممبئی، 16 اگست (یو این آئی) منیشا کوئرالا ہندی سنیما کی ان اداکاراؤں میں شمار ہوتی ہیں جنہوں نے 1990 کی دہائی میں اپنی خوبصورتی کے ساتھ ساتھ قدرتی، سنجیدہ اور جذباتی اداکاری سے الگ مقام بنایا۔ وہ ہندی کے علاوہ تمل، ملیالم اور نیپالی فلموں میں بھی کام کر چکی ہیں۔ 16 اگست 1970 کو نیپال میں پیدا ہونے والی منیشا 2026 میں 56 برس کی ہو گئی ہیں۔.