نئی دہلی، 21 جنوری (یو این آئی) عام آدمی پارٹی (آپ) کے قومی کنوینر اروند کیجریوال نے کچی آبادیوں اور غریبوں کو خبردار کرتے ہوئے کہا ہے کہ اگر دہلی میں بھارتیہ جنتا پارٹی (بی جے پی) اقتدار میں آتی ہے تو وہ آپ کو آسیب کی طرح نگل جائے گی۔
مسٹر کیجریوال نے منگل کو ' ایکس ' پر ایک ویڈیو جاری کیا اور کہا 'میں نے پیر کو کہا تھا کہ راون سونے کے ہرن کی شکل میں آیا ہے۔ اس کے بعد آج پوری بی جے پی میرے گھر کے سامنے دھرنے پر بیٹھی ہے اور کہہ رہی ہے کہ میں نے راون کی توہین کیسے کی؟ آخر بی جے پی والے راون سے اتنا پیار کیوں کرتے ہیں؟ ان میں شیطانی رجحانات ہوتے ہیں۔ میں دہلی کی جھگی جھونپڑی بستیوں اور غریبوں کو متنبہ کرنا چاہتا ہوں کہ اگر یہ لوگ آئے تو آپ کو آسیب کی طرح نگل جائیں گے۔
آپ کے سینئر لیڈر منیش سسودیا نے ' ایکس ' پر کہا "کل کیجریوال نے ایک جلسہ عام میں راون سے متعلق ایک تبصرہ کیا اور پوری بی جے پی فوراً راون کے دفاع میں کود پڑی، جیسے وہ خود راون کی اولاد ہوں۔ ان کی سیاست اس قدر گر چکی ہے کہ اب انہوں نے راون جیسی علامتوں کا سہارا لے کر اپنے جھوٹے بیانات کو درست ثابت کرنا شروع کر دیا ہے۔ میں دہلی کے لوگوں سے کہنا چاہتا ہوں کہ وہ ان کے اصلی ارادوں کو پہچانیں۔ انتخابات کے بعد وہ غریبوں، مزدوروں اور جھگی جھونپڑی کے لیے راون سے بھی بڑا خطرہ ثابت ہوں گے۔
انہوں نے کہا کہ ان سے ہوشیار رہنا بہت ضروری ہے کیونکہ ان کا اصل ایجنڈا صرف اقتدار حاصل کرنا ہے۔ وہ کچی آبادیوں کو گرانے اور سرکاری زمینوں پر قبضے کی سازش کر رہے ہیں۔ ان کے جھوٹے ڈراموں سے ہوشیار رہیں اور صحیح فیصلہ کریں۔
آپ کے سینئر لیڈر اور راجیہ سبھا کے رکن سنجے سنگھ نے کہا 'بی جے پی کا صرف ایک نعرہ ہے، راون ہمارا آئیڈیل ہے۔ اس کا آئیڈیل راون ہے۔ میں بہت حیران ہوں کہ پوری بی جے پی اپواس اور بھوک ہڑتال کر کے کہہ رہی ہے کہ کیجریوال نے راون کی توہین کی ہے۔ اس کا صاف مطلب ہے کہ بی جے پی راون کو اپنی اولاد مانتی ہے، اس لیے میں دہلی کے لوگوں سے کہنا چاہتا ہوں کہ ہوشیار رہیں۔ یہ لوگ راون کی توہین کرکے میدان میں آگئے۔ انتخابات سے پہلے ان کا اصلی کردار دہلی اور ملک کے لوگوں کو معلوم ہو گیا ہے۔
یو این آئی ۔ ع خ