نئی دہلی، 21 مارچ (یو این آئی) تمل ناڈو کے ساتھ زبان کے تنازعہ کے درمیان، مرکزی وزیر داخلہ امت شاہ نے جمعہ کو راجیہ سبھا میں واضح کیا کہ اگلے دسمبر سے، وہ ہر ریاستی حکومت اور لوگوں سے مقامی زبان میں بات چیت کریں گے۔
وزارت داخلہ کے کام کاج پرہوئی بحث کا تفصیل سے جواب دیتے ہوئے مسٹر شاہ نے کہا کہ مودی حکومت ملک کی تمام زبانوں کے فروغ کے لیے کام کر رہی ہے اور اس کے لیے ایک الگ انڈین لینگویج سیکشن ڈیپارٹمنٹ بنایا گیا ہے۔ انہوں نے کہا کہ حکومت جنوبی ہند کی زبانوں کے خلاف نہیں ہے لیکن زبان کے نام پر زہر پھیلانے اور اس کی آڑ میں بدعنوانی اور گھوٹالوں کی اجازت نہیں دی جائے گی۔
انہوں نے کہا کہ دسمبر کے بعد وہ خود ہر ریاست کی حکومت اور وہاں کے لوگوں سے ان کی زبان میں بات چیت کریں گے۔ انہوں نے تمل ناڈو میں حکمراں ڈی ایم کے حکومت پر حملہ کرتے ہوئے کہا کہ اس نے تمل میں میڈیکل اور انجینئرنگ کی تعلیم فراہم کرنے کی ہمت نہیں دکھائی۔ انہوں نے کہا کہ ریاست میں اقتدار میں آنے کے بعد ان کی حکومت تمل زبان میں میڈیکل اور انجینئرنگ کی تعلیم فراہم کرے گی۔ وزیر موصوف نے کہا کہ حکومت زبان کے نام پر ملک کی تقسیم کی اجازت نہیں دے گی اور وہ پہلے ہی کئی بار واضح کر چکی ہے کہ ہندی کا کسی سے مقابلہ نہیں ہے، ہندی تمام زبانوں کی دوست ہے۔ انہوں نے کہا کہ حکومت تمام زبانوں کے فروغ کے لیے پرعزم ہے۔
یواین آئی۔الف الف