نئی دہلی، 23جون (یو این آئی) قومی اردو کونسل کے ڈائرکٹر ڈاکٹرشمس اقبال نے کہا کہ زبان و ادب کے علاوہ مختلف موضوعا ت پر ریفرل کتابیں شائع کرنا قومی اردو کونسل کی ترجیحات میں شامل ہے۔ جب ہم انڈین نالج سسٹم کو متعارف کرانے کی بات کرتے ہیں تو یہ پینل بہت اہم ہوجاتا ہے۔اس پینل نے ہندوستانی نظامِ تعلیم (آئی کے ایس) کے تعارف میں اہم کردار ادا کیا ہے۔
اس امر کا اظہار قومی اردوکونسل برائے فروغ اردوزبان، کے صدردفترمیں آج سوشل سائنس پینل کی میٹنگ میں اظہار خیال کرتے ہوئے کہی۔
پینل کے صدرپروفیسرایس ایم عزیزالدین نے (سابق ڈائریکٹر، رامپور رضا لائبریری، وزارت ثقافت ہند) صدارت کرتےہوئے کونسل کے کاموں کی ستائش کی اور کہاکہ ترجموں کے علاوہ اوریجنل کتابیں بھی لکھوائی جائیں کیونکہ ترجمے میں مترجم دوسری زبان کا پابند ہوجاتا ہے۔ جامعہ ملیہ اسلامیہ میں شعبۂ سماجیات کی پروفیسرعذرا عابدی نے ہندوستانی سماجی مفکرین پرکام کرنے کی ضرورت پر زوردیا اور یہ بھی کہا کہ اگر ہندوستان کی ممتازسماجی اور ادبی شخصیات کے افکار و اقدار کے حوالے سے کتابیں شائع کی جائیں تو یقینا اس سے ہمارے علمی اور ادبی سماج کو بہت فائدہ ہوگا اور اس کے بہت مفید اور مثبت نتائج بھی برآمد ہوں گے۔ فیروز بخت احمد نے قومی اردو کونسل کی تیزگام رفتار سے اردو کے فروغ کے لیے کیے جانے والے کام کی ستائش کی، خاص طور پر اردو میں سوشل سائنس کو فروغ دینے کی کوشش قابل تحسین ہے۔
میٹنگ میں شامل پینل کے دیگر ممبران میں پروفیسرنکہت نسرین (چیئرپرسن اینڈ پروفیسر ڈپارٹمنٹ آف ایجوکیشن، علی گڑھ مسلم یونیورسٹی، اترپردیش)، ڈاکٹرشائستہ بیدار(سابق ڈائریکٹر، خدا بخش اورینٹل پبلک لائبریری، پٹنہ)، ڈاکٹرمظفر اسلام (اسسٹنٹ پروفیسرسابق پرنسپل مولاناآزادنیشنل اردویونیورسٹی)، محمدمظاہرخاں(سابق رکن گورننگ کونسل،این سی پی یوایل) کے علاوہ ڈاکٹرعبدالباری (اسسٹنٹ ایڈیٹر،این سی پی یوایل)، ڈاکٹر مسرت(ریسرچ آفیسر) اورڈاکٹرجاویدنے شرکت کی۔
یو این آئی۔ ع ا۔