نئی دہلی، 5 دسمبر (یو این آئی) مرکزی حکومت نے انڈیگو کے معاملے کی وجوہات کا تعین کرنے اور مستقبل میں ایسی صورتحال کو روکنے کے لیے اقدامات تجویز کرنے کے لیے اعلیٰ سطحی تحقیقات کرانے کا فیصلہ کیا ہے شہری ہوا بازی کی وزارت کی طرف سے جمعہ کے روز جاری کردہ پریس ریلیز میں کہا گیا ہے کہ شہری ہوا بازی کے ڈائریکٹوریٹ جنرل (ڈی جی سی اے) نے فلائٹ ڈیوٹی ٹائم لمیٹیشن (ایف ڈی ٹی ایل) سے متعلق اپنا حکم فوری طور پر واپس لے لیا ہے۔ یہ فیصلہ مکمل طور پر مسافروں، بالخصوص بزرگ شہریوں، طلبہ، مریضوں اور ناگزیر ضروریات کے لیے سفر کرنے والے دیگر افراد کے حق میں کیا گیا ہے۔
واضح ر ہے کہ ڈی جی سی اے نے جمعہ کے روز ایف ڈی ٹی ایل سے متعلق حکم کو جزوی طور پر واپس لے لیا تھا۔ ریگولیٹر نے وہ حصہ واپس لے لیا جس میں پائلٹ کو ہفتہ واری چھٹی کے ساتھ لازمی 48 گھنٹے کے ہفتہ واری مہلت کو ملانے سے منع کیا گیا تھا۔
وزارت نے کہا کہ مرکزی حکومت نے اس معاملے کی اعلیٰ سطحی تحقیقات کرنے کا فیصلہ کیا ہے۔ تحقیقات میں انڈیگو کی پروازوں میں تاخیر اور منسوخی کی وجوہات کا تعین کیا جائے گا۔ جہاں بھی مناسب کارروائی کی ضرورت ہوگی ذمہ داری طے کی جائے گی، اور مستقبل میں ایسے حالات کو روکنے کے لیے اقدامات تجویز کیے جائیں گے۔
وزارت نے کہا کہ ایئر لائنز کو کئی آپریشنل ہدایات جاری کی گئی ہیں تاکہ جلد از جلد خدمات کی بحالی کو یقینی بنایا جا سکے۔ وزارت نے امید ظاہر کی ہے کہ ان ہدایات پر فوری عمل درآمد ہفتہ سے پروازوں کے شیڈول کو معمول پر لانے کا باعث بنے گا اور اگلے تین دنوں میں معمول کے مطابق مکمل سروس متوقع ہے۔
وزارت نے ایئر لائنز کو ہدایت دی ہے کہ وہ باقاعدگی سے درست اپ ڈیٹس فراہم کریں تاکہ مسافر ہوائی اڈے کے لیے روانہ ہونے کے بجائے گھر سے پرواز کی صورتحال کی نگرانی کر سکیں۔
ایئرلائنز کو ہدایت دی گئی ہے کہ وہ فلائٹ کینسل ہونے کی صورت میں مسافر کی درخواست کا انتظار کیے بغیر مکمل ریفنڈ فراہم کریں۔
ریلیز میں کہا گیا ہے کہ ایئر لائنز کو ہوائی اڈے پر پھنسے ہوئے مسافروں کے لیے ہوٹل میں رہائش کا براہ راست انتظام کرنا ہو گا۔ بزرگ شہریوں اور معذور افراد کو لاؤنج تک رسائی فراہم کی جائے گی۔
وزارت نے حقیقی وقت میں صورتحال کی نگرانی کے لیے 24x7 کنٹرول روم بھی قائم کیا ہے۔
واضح رہے کہ جمعہ کے روز بھی انڈیگو کی سینکڑوں پروازیں منسوخ کر دی گئیں۔ دہلی میں 225 سے زیادہ اور ممبئی میں 250 سے زیادہ پروازیں منسوخ کی گئیں۔ دوسرے شہروں سے بھی منسوخی کی اطلاع ملی ہے۔ اس سے قبل جمعرات کے روز تقریباً 400 پروازیں منسوخ کر دی گئی تھیں۔ ایئر لائن نے کہا ہے کہ وہ ایف ڈی ٹی ایل کے نئے قوانین کے مطابق عملہ کی ضرورت کا اندازہ لگانے میں ناکام رہی ہے۔ مزید برآں، تکنیکی اور اے ٹی سی سے متعلقہ وجوہات کی بنا پر اس کی پروازیں منسوخ کر دی گئیں۔
یو این آئی۔ م ش۔