نئی دہلی، 7 دسمبر (یو این آئی) صدر جمہوریہ دروپدی مرمو اور وزیر اعظم نریندر مودی نے گوا کے ارپورا میں پیش آئے ہولناک آتشزدگی کے واقعے پر اتوار کے روز گہرے رنج و غم ظاہر کیا۔
صدر مرمو نے سوشل میڈیا پر لکھا ’’شمالی گوا ضلع میں آگ لگنے کے افسوسناک واقعے سے انتہائی دکھ ہوا۔ اس میں کئی قیمتی جانیں ضائع ہوگئیں۔ متاثرہ خاندانوں کے ساتھ میری گہری ہمدردیاں ہیں۔ بھگوان انہیں اس مشکل گھڑی میں حوصلہ دے۔ میں زخمیوں کی جلد صحت یابی کی پراتھنا کرتی ہوں۔‘‘
وزیر اعظم مودی نے بھی اس حادثے میں ہوئیں اموات پر دکھ ظاہر کرتے ہوئے زخمیوں کی جلد صحت یابی کی خواہش کی۔ وزیراعظم نے بتایا کہ انہوں نے صورتحال کے بارے میں گوا کے وزیر اعلیٰ ڈاکٹر پرمود ساونت سے بات کی ہے۔ مرکزی حکومت اس سانحے سے متاثرہ لوگوں کو ہر ممکن مدد فراہم کر رہی ہے۔
وزیراعظم نے سوشل میڈیا پر لکھا ’’گوا کے اَرپورا میں آگ لگنے کا واقعہ انتہائی افسوسناک ہے۔ میری ہمدردیاں ان تمام لوگوں کے ساتھ ہیں جنہوں نے اپنے عزیز کھودئے ہیں۔ زخمی جلد صحت یاب ہوں۔ صورتحال کے بارے میں گوا کے وزیر اعلیٰ ڈاکٹر پرمود ساونت جی سے گفتگو کی۔ ریاستی حکومت متاثرہ افراد کو ہر ممکن مدد فراہم کر رہی ہے۔‘‘
وزیراعظم نے ہر متوفی کے اہل خانہ کو دو لاکھ روپے اور زخمیوں کو 50 ہزار روپے کی راحتی رقم دینے کا بھی اعلان کیا۔
وزیراعظم کے دفتر نے سوشل میڈیا پر لکھا ’’گوا کے اَرپورا میں پیش آئے حادثے میں ہر متوفی کے اہل خانہ کو وزیراعظم قومی ریلیف فنڈ (پی ایم این آر ایف) سے 2 لاکھ روپے کی راحتی رقم دی جائے گی۔ زخمیوں کو 50 ہزار روپے دیئے جائیں گے۔‘‘
یو این آئی۔ این یو۔