نئی دہلی، 09 مئی (یواین آئی) وزیراعظم نریندر مودی اتوار سے دو روزہ گجرات دورے پر جائیں گے، جہاں وہ سومناتھ مندر میں ’سومناتھ امرت مہوتسو‘ میں شرکت کریں گے۔
مودی اتوار کی دیر رات گجرات کے جام نگر پہنچیں گے اور پیر کی صبح سومناتھ مندر میں 'سومناتھ امرت مہوتسو' میں حصہ لیں گے۔ اس کے بعد وہ وڈودرا جائیں گے، جہاں وہ تقریباً شام چھ بجے سرداردھام ہاسٹل کا افتتاح کریں گے۔ وہ دونوں مواقع پر عوامی اجتماعات سے خطاب بھی کریں گے۔ مقدس سومناتھ مندر 12 جیوترلنگوں میں سے ایک ہے اور ہندوستان کے لازوال عقیدے اور تہذیبی ورثے کی علامت ہے۔ سومناتھ امرت مہوتسو دوبارہ تعمیر شدہ مندر کے افتتاح کے 75 سال مکمل ہونے کی علامت ہے۔
اس تقریب کے تحت وزیراعظم مختلف مذہبی اور ثقافتی پروگراموں میں شرکت کریں گے۔ وہ خصوصی مہا پوجا میں شامل ہوں گے، جس کے بعد کمبھ ابھیشیک اور پرچم کشائی کی تقریبات ہوں گی، جن میں مندر کی ابھیشیک رسم اور جھنڈا لہرانے کا عمل مکمل ہوگا۔ مودی اس موقع پر ایک یادگاری ڈاک ٹکٹ اور سکہ بھی جاری کریں گے، جو سومناتھ کے بھرپور ورثے اور روحانی اہمیت کی عکاسی کرتے ہیں۔ وزیراعظم وڈودرا میں سرداردھام ہاسٹل کا افتتاح کریں گے۔ اس منصوبے میں 1,000 لڑکوں اور 1,000 لڑکیوں کے لیے ہاسٹل کی سہولیات شامل ہیں، ساتھ ہی مرکزی فوڈ کورٹ، لائبریری اور آڈیٹوریم جیسی سہولیات بھی دستیاب ہیں۔ وزیراعظم سرداردھام کمپلیکس کی مختلف سہولیات کا معائنہ بھی کریں گے، جن میں استقبالیہ کی جگہ ، شہری سہولیات، ڈائننگ ایریا اور ای-لائبریری شامل ہیں۔
یواین آئی ۔ایف اے