نئی دہلی، 13 جون (یو این آئی) کانگریس نے کہا ہے کہ الیکشن کمیشن پوری طرح سے بھارتیہ جنتا پارٹی (بھاجپا) کے دباؤ میں کام کر رہا ہے اور کانگریس اس مسئلے کے خلاف ملک گیر مہم چلا کر لوگوں کو بیدار کرے گی۔
کانگریس سے وابستہ راجیو گاندھی پنچایتی راج تنظیم کے چیئرمین مسٹر سنیل پنوار نے ہفتہ کو راج گھاٹ پہنچنے کے بعد یہ بات کہی۔ انہوں نے کہا کہ تنظیم کے کارکنوں نے جمعہ کو جنتر منتر پر ستیہ گرہ کیا تھا اور الیکشن کمیشن کے دفتر کے سامنے غیر معینہ مدت کے لیے بھوک ہڑتال کا عزم کیا تھا، لیکن انہیں اجازت نہیں دی گئی۔ احتجاج کرنے والے کئی کارکنوں کو پولیس نے حراست میں بھی لیا۔
انہوں نے یہ بھی الزام لگایا کہ الیکشن کمیشن آج اقتدار کی کٹھ پتلی اور بھارتیہ جنتا پارٹی کی ذیلی تنظیم کی طرح کام کر رہا ہے۔ انہوں نے کہا کہ یہ لڑائی صرف کسی ایک لیڈر یا مسئلے تک محدود نہیں ہے، بلکہ گاندھی وادی نظریات اور جمہوری اقدار کے تحفظ کے لیے ہے۔
یو این آئی ایف اے