نئی دہلی، 13 جون (یو این آئی) دہلی کے وزیر توانائی آشیش سود نے ہفتہ کو کہا کہ عالمی سطح پر ایندھن کی قیمتوں میں اضافے اور مغربی ایشیا میں جاری بحران کے درمیان دہلی حکومت نے بجلی صارفین کو راحت دینے کا دعویٰ کیا ہے۔
مسٹر سود نے آج کہا کہ بجلی کی خریداری کی لاگت میں بھاری اضافے کے باوجود حکومت نے صارفین پر اس کے اثرات کو کم سے کم رکھنے کے لیے موثر اقدامات کیے ہیں۔ انہوں نے واضح کیا کہ پاور پرچیز ایڈجسٹمنٹ کاسٹ (پی پی اے سی) کوئی نیا نظام نہیں ہے، بلکہ بجلی کے قوانین کے تحت پہلے سے نافذ ایک ریگولیٹری شق ہے۔ اس کے ذریعے بجلی تقسیم کرنے والی کمپنیاں ایندھن اور بجلی کی خریداری کی بڑھی ہوئی لاگت کو ایڈجسٹ کرتی ہیں۔ انہوں نے بتایا کہ بین الاقوامی حالات کی وجہ سے گزشتہ ایک ماہ میں بجلی کی خریداری کی لاگت میں تقریباً 31 فیصد اضافہ ہوا ہے۔ اس کے باوجود دہلی الیکٹرسٹی ریگولیٹری کمیشن (ڈی ای آر سی) نے اوسطاً صرف 2.4 فیصد پی پی اے سی اضافے کی اجازت دی ہے تاکہ صارفین پر اضافی بوجھ کو محدود رکھا جا سکے۔
مسٹر سود کے مطابق پہلے پی پی اے سی کی حد 31 مارچ تک 14.5 فیصد تھی، جسے اب بڑھا کر تقریباً 17.5 سے 17.9 فیصد کیا گیا ہے۔ انہوں نے کہا کہ یہ اقدام ایندھن کی بڑھتی ہوئی عالمی قیمتوں کے پورے اثرات سے صارفین کو بچانے کے مقصد سے اٹھایا گیا ہے۔ وزیر توانائی نے کہا کہ پی پی اے سی ملک بھر میں نافذ ایک عام ریگولیٹری نظام ہے اور اس کا تعین بجلی کے قوانین کے مطابق کیا جاتا ہے۔ انہوں نے کہا کہ ڈی ای آر سی کا تازہ ترین حکم بجلی تقسیم کرنے والی کمپنیوں کے مالی استحکام اور صارفین کے مفادات کے درمیان توازن پیدا کرنے کی ایک کوشش ہے۔ انہوں نے یہ بھی واضح کیا کہ دہلی حکومت کی بجلی سبسڈی کا فائدہ حاصل کرنے والے صارفین پر اس اضافے کا کوئی اثر نہیں پڑے گا۔ ایسے صارفین کے بجلی کے بل میں کسی قسم کا اضافی بوجھ نہیں آئے گا۔
مسٹر سود نے الزام لگایا کہ کچھ لوگ اس موضوع پر وہم و گمان پھیلانے کی کوشش کر رہے ہیں، جبکہ حکومت صارفین کے مفادات کے تحفظ کے لیے پوری طرح پرعزم ہے۔ انہوں نے کہا کہ حکومت یہ یقینی بنا رہی ہے کہ توانائی کی بڑھتی ہوئی لاگت کا بوجھ عوام پر نہ پڑے۔
یو این آئی ایف اے