نئی دہلی، 13 جون (یو این آئی) دہلی کی پٹیالہ ہاؤس عدالت نے وزیر اعظم کے دفتر کے پاس واقع جے پور پولو گراؤنڈ سے بے دخلی کے معاملے میں حکومت کے فیصلے پر روک لگانے سے انکار کر دیا۔
تعطیلاتی بنچ کے جج دھیریندر رانا نے حکومت کے بے دخلی کے حکم کے خلاف انڈین پولو ایسوسی ایشن کی عرضی پر ہفتہ کو سماعت کی۔ راجدھانی کے ریس کورس علاقے میں وزیر اعظم کے دفتر کے قریب واقع جے پور پولو گراؤنڈ کو مرکزی حکومت نے اپنے قبضے میں لے لیا ہے۔ حکومت نے اس کے دروازے پر ایک نوٹس چسپاں کیا ہے، جس میں اسے سرکاری جائیداد قرار دیا گیا ہے۔ حکومت نے نوٹس میں کسی بھی غیر مجاز قبضے یا تجاوزات کے خلاف وارننگ دی ہے۔
انڈین پولو ایسوسی ایشن نے پبلک پریمیسس (غیر مجاز قبضہ کرنے والوں کی بے دخلی) قانون، 1971 کی دفعہ 9(3) کے تحت درخواست داخل کی تھی، جس میں 20 مئی 2026 کے بے دخلی کے حکم پر روک لگانے کا مطالبہ کیا گیا تھا۔ سماعت کے دوران مرکزی حکومت کے وکیل نے اپیل اور اسٹے کی درخواست دونوں پر جواب داخل کرنے کے لیے وقت مانگا۔ اپیل کنندہ نے سماعت ملتوی کرنے کی مخالفت کی اور درخواست کی کہ اگلی سماعت تک مدعا علیہ کو بے دخلی کے حکم پر عمل درآمد سے روکا جائے، کیونکہ ایسا نہ کرنے کی صورت میں اپیل بے اثر ہو جائے گی۔ دلائل سننے اور ریکارڈ کی جانچ کے بعد عدالت نے پایا کہ اپیل 3 جون کو دائر کی گئی تھی اور پہلے کوئی عبوری روک نہیں دی گئی تھی۔ عدالت نے یہ بھی دیکھا کہ انڈین پولو ایسوسی ایشن نے رٹ پٹیشن (سول) نمبر 8112/2026 کے ذریعے دہلی ہائی کورٹ سےرجوع کیا تھا، جہاں اسی طرح کی عبوری راحت کی درخواست کو مسترد کر دیا گیا تھا۔ ہائی کورٹ نے 8 جون کو درخواست کا تصفیہ کرتے ہوئے ہدایت دی تھی کہ روک لگانے کی عرضی پر پٹیالہ ہاؤس کورٹ کے ضلع اور سیشن جج فیصلہ کریں، اور یہ بھی کہا تھا کہ 12 جون تک بے دخلی کے حکم کو فوری طور پر نافذ کرنے کا کوئی امکان نہیں ہے۔
عدالت نے اپنے حکم میں کہا کہ چونکہ اسٹے کی درخواست سماعت کے دن ہی دائر کی گئی تھی اور مدعا علیہ کو اس کی پیشگی کاپی نہیں دی گئی تھی، اس لیے فوری طور پر دلائل نہیں سنے جا سکتے تھے کیونکہ مدعا علیہ کو جواب داخل کرنے کا حق تھا۔ اگلی سماعت کی تاریخ تک بے دخلی کے حکم پر عمل درآمد روکنے کی درخواست کو مسترد کرتے ہوئے عدالت نے کہا کہ اسی طرح کی درخواستیں پہلے بھی پرنسپل ڈسٹرکٹ اینڈ سیشن جج، پٹیالہ ہاؤس عدالت اور دہلی ہائی کورٹ کے سامنے کی گئی تھیں، لیکن کوئی راحت نہیں دی گئی تھی۔ عدالتی نظم و ضبط اور شائستگی کا حوالہ دیتے ہوئے عدالت نے کہا کہ وہ متنازعہ حکم پر عمل درآمد روکنے کے حق میں نہیں ہے۔ عبوری تحفظ دینے سے عدالت کے انکار کے بعد انتظامیہ نے کارروائی کی اور عمارت کا قبضہ اپنے کنٹرول میں لے لیا۔ عدالت نے حکومت ہند کو اپیل اور اسٹے کی درخواست پر جواب داخل کرنے کی ہدایت دی اور حکم دیا کہ اپیل کنندہ کے وکیل کو پیشگی کاپیاں فراہم کی جائیں۔ اب یہ معاملہ 17 جون کو مزید سماعت کے لیے تعطیلاتی بنچ کے جج کے سامنے فہرست بند کیا گیا ہے۔
یو این آئی ایف اے