نئی دہلی، 08 جولائی (یو این آئی) قومی تحقیقاتی ایجنسی (این آئی اے) نے بدھ کو آن لائن انتہا پسند نظریات پھیلا کر لوگوں کوانتہا پسند بنانے کے معاملے میں ملک بھر میں چھاپے مارےاین آئی اے کی ٹیم نے اس معاملے میں جاری تحقیقات کے تحت آندھرا پردیش، تلنگانہ، کرناٹک، مہاراشٹر، اتر پردیش، مغربی بنگال، بہار، راجستھان، گجرات اور دہلی میں کل 20 مقامات پر بیک وقت چھاپے مارے۔ آج کی تلاشی کے دوران متعدد ڈیجیٹل آلات ضبط کیے گئے۔ انتہا پسندانہ سازش کے بارے میں مزید سراغ حاصل کرنے کے لیے ان کی فرانزک جانچ کی جائے گی۔ اس معاملے میں اب تک 11 ملزمان کو گرفتار کیا گیا ہے اور ایک نابالغ کو حراست میں لیا گیا ہے۔ این آئی اے نے اس معاملے کو مئی 2026 میں آندھرا پردیش کی وجئے واڑہ پولیس سے اپنے ہاتھ میں لیا تھا۔
وجئے واڑہ پولیس نے مارچ میں یہ معاملہ درج کیا تھا۔ یہ معاملہ اہم ملزم رحمت اللہ شریف محمد کے گھر کی تلاشی کے بعد درج کیا گیا تھا جس میں ممنوعہ دہشت گرد تنظیموں اے کیو آئی ایس (القاعدہ ان دی انڈین سب کانٹینینٹ) اور آئی ایس آئی ایس (اسلامک اسٹیٹ) سے وابستہ قابل اعتراض مواد برآمد ہوا تھا۔
این آئی اے ملک کو غیر مستحکم کرنے اور 'خلافت' قائم کرنے کی سازش میں ملوث دیگر افراد کی شناخت کرنے کی سمت میں کام کر رہی ہے۔ ایجنسی نے پایا ہے کہ گرفتار ملزمان اور ان کے ساتھی پرتشدد جہادی مواد اور غلط معلومات پھیلا کر ملک بھر میں آسانی سے متاثر ہونے والے نوجوانوں کو انتہا پسند بنانے کا کام کر رہے تھے۔ ملزمان جہادی نظریے کی تشہیر کرنے اور ہندستان مخالف سازش کو فروغ دینے کے لیے اپنے غیر ملکی آقاؤں کے ساتھ آن لائن رابطے میں بھی ہیں۔
یو این آئی۔ ایف اے