نئی دہلی، 9 جولائی (یو این آئی) وزیر اعظم نریندر مودی نے آسٹریلیا کے سرمایہ کاروں سے ہندوستان میں طویل مدتی سرمایہ کاری کے مواقع کا فائدہ اٹھانے کی اپیل کرتے ہوئے کہا ہے کہ وہ مینوفیکچرنگ، متبادل توانائی، اہم معدنیات، کان کنی، بنیادی ڈھانچہ، ہوا بازی، لاجسٹکس، جدید ٹیکنالوجی اور مصنوعی ذہانت (اے آئی) جیسے شعبوں میں مل کر کام کر سکتے ہیں۔
مسٹر مودی نے اپنے دورہ آسٹریلیا کے دوسرے دن صبح آسٹریلیا کے وزیر اعظم اینتھنی البانیز کے ساتھ میلبورن میں مشترکہ طور پر آسٹریلیا-ہندوستان چیف ایگزیکٹو آفیسر (سی ای او) فورم اور اکنامک روڈ میپ بزنس پروگرام سے خطاب کیا۔ ان دونوں پروگراموں میں ہندوستان اور آسٹریلیا کے بڑے چیف ایگزیکٹو افسران اور صنعت کاروں، آسٹریلیا کے اہم ریٹائرمنٹ فنڈز اور ادارہ جاتی سرمایہ کاروں کے نمائندوں اور آسٹریلیا کی معروف یونیورسٹیوں کے وائس چانسلرز نے شرکت کی۔
مسٹر مودی نے سی ای او فورم سے خطاب کرتے ہوئے کہا کہ ہندوستان کی مضبوط اقتصادی ترقی، پالیسی اصلاحات، ڈیجیٹل تبدیلی اور تیزی سے ترقی کرتے ہوئے اختراعی ایکو سسٹم سے آسٹریلیا کے شراکت داروں کے لیے نئے کاروباری مواقع پیدا ہو رہے ہیں۔
ہندوستانی اور آسٹریلوی معیشتوں کے باہمی تعاون کا ذکر کرتے ہوئے مسٹر مودی نے کہا کہ مینوفیکچرنگ، متبادل توانائی، اہم معدنیات، کان کنی، بنیادی ڈھانچہ، شہری ترقی، ہوا بازی، لاجسٹکس، جدید ٹیکنالوجی، مصنوعی ذہانت، مالیاتی ٹیکنالوجی (فن ٹیک)، فوڈ پروسیسنگ اور ڈیجیٹل معیشت جیسے شعبوں میں ہندوستان میں وسیع مواقع دستیاب ہیں۔ انہوں نے کہا کہ ہندوستان کا وسیع پیمانہ اور آسٹریلیا کی مہارت دونوں ممالک کے لیے یکساں طور پر فائدہ مند ثابت ہوگی۔
جاری یو این آئی۔ ایم جے