نئی دہلی، 11 جولائی (یو این آئی) ہندستان اور نیوزی لینڈ نے دوطرفہ تعلقات کا نیا باب شروع کرتے ہوئے اسٹریٹجک شراکت داری روڈ میپ 2030 کا اعلان کیا ہے اور اس میں سیاسی تعاون، دفاع و سلامتی، تجارت و اقتصادی تعاون، عوامی رابطہ، تعلیم و ٹیکنالوجی اور علاقائی و کثیر جہتی تعاون کو چھ اہم ستونوں کے طور پر شامل کیا گیا ہے۔
وزیر اعظم نریندر مودی اور نیوزی لینڈ کے وزیر اعظم کرسٹوفر کے درمیان جمعہ کی دیر رات آکلینڈ میں ہوئی میٹنگ کے دوران یہ اتفاق رائے قائم ہوا۔ دونوں ممالک نے وزیر اعظم، کابینہ وزیر اور وزیر خارجہ کی سطح پر باقاعدہ اعلیٰ سطحی بات چیت جاری رکھنے کے ساتھ ساتھ پارلیمانی اور ادارہ جاتی تعاون کو مضبوط کرنے پر اتفاق کیا۔ دفاع اور سلامتی کے شعبے میں ہندستان اور نیوزی لینڈ نے فوجی تبادلوں، دفاعی مذاکرات، سمندری تعاون، بحریہ کی سرگرمیوں اور ہند-بحرالکاہل سمندری اقدام کے تحت تعاون بڑھانے کا فیصلہ کیا۔ دونوں ممالک دہشت گردی کے خلاف تعاون، سائبر سکیورٹی، قانون نافذ کرنے والے اداروں، منشیات کی اسمگلنگ کو روکنے اور آفات سے نمٹنے کے لیے بنیادی ڈھانچے کے شعبے میں بھی تعاون کے نظام کو مضبوط کریں گے۔
تجارت اور اقتصادی تعاون کے تحت دونوں ممالک نے 2030 تک اشیاء اور خدمات میں دوطرفہ تجارت کو دوگنا کر کے 35000 کروڑ روپے تک پہنچانے کا پرجوش ہدف طے کیا۔ ہندستان-نیوزی لینڈ آزاد تجارتی معاہدے کو جلد نافذ کرنے کی سمت میں آگے بڑھنے اور کسٹم تعاون کے ذریعے تجارت کو آسان بنانے پر اتفاق ہوا۔ باغبانی، جنگلات، مویشی پروری، ڈیری اور سیاحت کے شعبوں میں بھی تعاون بڑھایا جائے گا اور براہِ راست ہوائی رابطوں کو فروغ دیا جائے گا۔ روڈ میپ میں غیر مقیم ہندستانی برادری کی شرکت، کھیلوں میں تعاون، روایتی ادویات، سمندری شعبے اور ثقافتی شراکت داری کے ذریعے لوگوں کے درمیان تعلقات مضبوط کرنے پر زور دیا گیا ہے۔ دونوں ممالک مقامی حکومتوں اور ثقافتی اداروں کے درمیان تعاون کی بھی حوصلہ افزائی کریں گے۔
تعلیم، تحقیق، سائنس اور ٹیکنالوجی کے شعبے میں دونوں ممالک نے ادارہ جاتی شراکت داری بڑھانے، زراعت، موسمیاتی کارروائی، ڈیجیٹل تبدیلی اور ابھرتی ہوئی ٹیکنالوجیز میں تعاون کرنے اور انٹرنیشنل سولر الائنس اور گلوبل بائیو فیول الائنس جیسے اقدامات کے ذریعے صاف توانائی کے تعاون کو مضبوط کرنے کا فیصلہ کیا۔ دونوں ممالک قدرتی آفات کے بندوبست کے شعبے میں بھی تعاون بڑھائیں گے، جس میں ہندستان کی نیشنل ڈیزاسٹر مینجمنٹ اتھارٹی اور نیوزی لینڈ کی نیشنل ایمرجنسی مینجمنٹ ایجنسی کے درمیان تعاون کے نظام کو نافذ کرنا شامل ہے۔
علاقائی اور عالمی مسائل پر ہندستان اور نیوزی لینڈ نے آسیان پر مبنی فورمز پر تعاون، قوانین پر مبنی ہند-بحرالکاہل نظام کی حمایت، بین الاقوامی قانون کے تحت تنازعات کے پرامن حل، اقوامِ متحدہ میں تعاون بڑھانے اور اصلاح شدہ سلامتی کونسل میں ہندستان کی مستقل رکنیت کی دعویداری کی حمایت سمیت اقوامِ متحدہ کی اصلاحات کو آگے بڑھانے پر اتفاق کیا۔ دونوں حکومتوں نے واضح کیا کہ روڈ میپ 2030 میں کوئی مالیاتی عہدبستگی شامل نہیں ہے اور یہ ملکی یا بین الاقوامی قانون کے تحت قانونی طور پر پابند کرنے والا حق یا ذمہ داری پیدا نہیں کرتا۔
یو این آئی۔ ایف اے