نئی دہلی، 13 جولائی (یو این آئی) ہندستان اور جاپان نے آزاد، کھلے اور قوانین پر مبنی ہند بحر الکاہل خطے کی پرزور وکالت کرتے ہوئے اسے فروغ دینے کے عزم کا اعادہ کیا ہے۔
وزارت دفاع نے پیر کو بتایا کہ دونوں ممالک کے درمیان آج جاپان کے دارالحکومت ٹوکیو میں آٹھویں دفاعی پالیسی پر گفتگو ہوئی۔ گفتگو میں ہندستانی وفد کی قیادت دفاعی سکریٹری راجیش کمار سنگھ نے اور جاپانی وفد کی قیادت بین الاقوامی امور کے نائب وزیر دفاع کانو کوجی نے کی۔ دونوں فریقین نے پچھلی دفاعی پالیسی گفتگو کے بعد سے دوطرفہ دفاعی تعاون میں ہوئی اہم پیش رفت کا جائزہ لیا اور ہندستان-جاپان خصوصی اسٹریٹجک اور عالمی شراکت داری کو مزید مضبوط کرنے کے اپنے عزم کا اعادہ کیا۔ دونوں ممالک نے موجودہ علاقائی اور عالمی سکیورٹی ماحول پر جامع تبادلۂ خیال کیا اور باہمی دلچسپی کے مسائل پر غور و خوض کیا۔ گفتگو میں دوطرفہ دفاعی سرگرمیوں کے تمام پہلوؤں کا جائزہ لیا گیا، جس میں فوجوں کے درمیان تبادلہ، مشترکہ ہیڈ کوارٹرز کے درمیان تعاون، سمندری تعاون، دفاعی مشقیں، صلاحیت سازی، دفاعی آلات اور ٹیکنالوجی تعاون (سمندری ٹیکنالوجی سمیت) پر بات چیت ہوئی۔
انہوں نے دفاعی شعبے میں تعاون کی مسلسل توسیع کا خیرمقدم کرتے ہوئے باقاعدہ اعلیٰ سطحی تبادلوں اور مکالمے کے نظام کو برقرار رکھنے کی اہمیت پر زور دیا۔ انہوں نے اس سال کے آخر میں ہونے والی ’ٹو پلس ٹو‘ گفتگو سمیت آئندہ وزارتی سطح کے دوروں کے ممکنہ نتائج پر تبادلۂ خیال کیا۔ دونوں وفود نے ابھرتے ہوئے شعبوں میں تعاون کو گہرا کرنے کے طریقوں پر بھی بات چیت کی، جن میں دفاعی صنعتی تعاون، تکنیکی جدت طرازی، سائبر سکیورٹی، خلا اور مشترکہ اسٹریٹجک مفاد کے دیگر شعبے شامل ہیں۔ انہوں نے علاقائی اور عالمی سکیورٹی کے مسائل پر ہندستان اور جاپان کے درمیان بڑھتی ہوئی ہم آہنگی پر اطمینان کا اظہار کیا اور ہند بحر الکاہل خطے میں مل کر کام جاری رکھنے پر اتفاق کیا۔ بین الاقوامی قانون پر مبنی آزاد، کھلے اور قوانین سے بندھے ہند بحر الکاہل خطے کو فروغ دینے کا بھی دونوں نے عزم دہرایا۔
دفاعی سکریٹری نے دفاعی شعبے میں ہندستان کے ساتھ جاپان کے مسلسل تال میل کی تعریف کی اور ہندستان-جاپان خصوصی اسٹریٹجک اور عالمی شراکت داری کے فریم ورک کے تحت عملی تعاون کو مضبوط کرنے کی اہمیت پر روشنی ڈالی۔ مسٹر کوجی نے ترجیحی شعبوں میں ہندستان کے ساتھ دفاعی تعلقات کو مزید بڑھانے کے لیے جاپان کے عزم کا اعادہ کیا۔ اس سے پہلے دن میں، دفاعی سکریٹری نے جاپان کے وزیر دفاع شنجیرو کوئزومی سے ملاقات کی اور وزیر دفاع راجناتھ سنگھ کی طرف سے نیک خواہشات پیش کیں۔ دونوں فریقین نے ہندستان-جاپان خصوصی اسٹریٹجک اور عالمی شراکت داری کی رفتار کا ذکر کیا۔ انہوں نے وزیر دفاع کی جانب سے جاپان کے وزیر دفاع کو جلد سے جلد ہندستان آنے کی دعوت بھی دی۔ دفاعی سکریٹری نے ٹوکیو میں ’سیلف ڈیفنس فورسز میموریل اسٹون‘ پر گلہائے عقیدت پیش کر کے اپنے دورے کا آغاز کیا اور جاپان کی سیلف ڈیفنس فورسز کے ان ارکان کو خراجِ عقیدت پیش کیا جنہوں نے ملک کی خدمت میں عظیم قربانی دی ہے۔
اس دورے نے ہندستان اور جاپان کے درمیان بڑھتے اور گہرے ہوتے دفاعی تعلقات، باہمی احترام اور ہند بحر الکاہل خطے میں امن، سکیورٹی اور استحکام کے تئیں ان کے مشترکہ عزم کو اجاگر کیا۔
یو این آئی۔ ایف اے