تھرواننت پورم، 9 جولائی (یو این آئی) تھرواننت پورم کے میئر وی وی راجیش نے مارکسسٹ کمیونسٹ پارٹی (سی پی ایم) پر سنگین الزامات لگاتے ہوئے کہا ہے کہ ایک سابق وزیر کی براہ راست اور بالواسطہ حمایت اور سی پی ایم کارکنوں اور مجرمانہ گروہوں کی مدد سے منظم کچرا مافیا دارالحکومت میں غیر قانونی طور پر کچرا پھینک رہا ہے۔
میئر نے الزام لگایا کہ اس کا مقصد شہر کو جان بوجھ کر آلودہ کرنا، بیماریوں کے پھیلنے کی صورتحال پیدا کرنا اور اقتدار کی تبدیلی کے بعد بی جے پی کی قیادت والی میونسپل کارپوریشن کا امیج خراب کرنا ہے۔ انہوں نے سی پی ایم سے رات کے اندھیرے میں ندیوں، نہروں اور عوامی مقامات پر کچرا پھینکنے کی مبینہ منظم مہم فوری طور پر بند کرنے کو کہا۔
مسٹر راجیش نے دعویٰ کیا کہ امایژانچن نہر میں غیر قانونی طور پر کچرا پھینکنے سے روکنے والے میونسپل کارپوریشن کے ملازمین پر حملے کے معاملے میں دوسرا ملزم شمسی سی پی ایم کارکن ہے اور اس کے پارٹی کے سینئر رہنماؤں سے قریبی تعلقات ہیں۔ انہوں نے میڈیا کے سامنے ایک تصویر دکھاتے ہوئے دعویٰ کیا کہ اس میں شمیر سی پی ایم کے چالا علاقائی سکریٹری سندر کے ساتھ دکھائی دے رہا ہے۔
مسٹر راجیش نے الزام لگایا کہ کچرا مافیا میونسپل کارپوریشن کی طرف سے مجاز ایجنسیوں کے کچرا جمع کرنے کے نظام میں خلل ڈال کر مجرمانہ نیٹ ورک کے ذریعے غیر قانونی طور پر کچرا اکٹھا کرتا ہے اور بھاری منافع کے لیے اسے ندیوں، نہروں اور عوامی مقامات پر پھینک دیتا ہے۔
یو این آئی۔ ایم جے