دہرادون، 06 اگست (یو این آئی) اتراکھنڈ میں مسلسل شدید بارش کی وجہ سے معمولاتِ زندگی بری طرح متاثر ہو گئے ہیں۔ ندیوں میں پانی کی سطح مسلسل بڑھنے سے سیلاب جیسی صورتحال پیدا ہو گئی ہے۔ تمام ندیاں خطرے کے نشان پر یا اس سے اوپر بہہ رہی ہیں۔ بیشتر علاقوں میں جمعرات کی صبح سے درمیانے درجے سے لے کر شدید بارش ہو رہی ہے۔ بدری ناتھ جانے والی سڑک بھی بند ہو گئی ہے۔
ریاستی آفات سے نمٹنے کے مرکز سے آج صبح موصولہ اطلاع کے مطابق، چمولی ضلع میں بدری ناتھ قومی شاہراہ ہیِلگ کے قریب ملبہ آنے کی وجہ سے بند ہو گئی ہے۔
ٹہری گڑھوال ضلع کے دیو پریاگ میں بھاگیرتھی ندی کی سطح آب آج صبح 06:00 بجے 462.00 میٹر ریکارڈ کی گئی، جو مسلسل بڑھ رہی ہے اور انتباہی سطح کے آس پاس بہہ رہی ہے۔
رودر پریاگ ضلع میں شدید بارش کے باعث ندیوں کی سطح آب بھی مسلسل بڑھ رہی ہے۔ صبح سات بجے الکنندا ندی کی سطح آب 627.70 میٹر اور منداکنی ندی کی سطح آب 626.20 میٹر ریکارڈ کی گئی۔ الکنندا ندی کے لیے انتباہی سطح 626.00 میٹر اور خطرے کی سطح 627.00 میٹر ہے، جبکہ منداکنی ندی کی انتباہی سطح 625.00 میٹر اور خطرے کی سطح 626.00 میٹر ہے۔ اس وقت الکنندا اور منداکنی دونوں ندیوں کی سطح آب خطرے کے نشان سے اوپر بہہ رہی ہے۔
محکمہ موسمیات کی وارننگ اور دونوں ندیوں میں پانی کی سطح مسلسل بڑھنے کے پیش نظر متعلقہ علاقوں میں انتہائی چوکس رہنے کی ہدایت دی گئی ہے۔ دریا کے کنارے رہنے والے لوگوں کی حفاظت کے لیے انہیں محفوظ مقامات پر منتقل ہونے اور محتاط رہنے کی ہدایت لاؤڈ اسپیکر کے ذریعے دی جا رہی ہے۔ ساتھ ہی کسی بھی ممکنہ قدرتی آفت سے نمٹنے کے لیے تیاری کی اعلیٰ ترین سطح برقرار رکھنے کی ہدایت جاری کی گئی ہے۔
اس کے علاوہ ہریدوار کے رائسی (بان گنگا) مقام پر صبح چھ بجے پانی کی سطح 230.09 میٹر ریکارڈ کی گئی، جو مسلسل بڑھ رہی ہے اور انتباہی سطح سے 0.09 میٹر اوپر بہہ رہی ہے۔
دہرادون ضلع کے چکراتا میں بارش ہو رہی ہے، جبکہ وکاس نگر میں آسمان ابر آلود ہے۔ کالسی، رشی کیش، ڈوئی والا اور مسوری میں بھی بارش ہو رہی ہے۔ تیونی علاقے میں فی الحال آسمان ابر آلود ہونے کی اطلاع ہے۔
اترکاشی ضلع میں گنگوتری قومی شاہراہ دھراسو نالو کے قریب پانی آنے کی وجہ سے متاثر ہونے کی اطلاع ہے۔ جبکہ یمنوتری قومی شاہراہ سِلائی بینڈ، دربل، جنگل چٹی اور سیانا چٹی کے قریب مسلسل پتھر اور ملبہ گرنے کی وجہ سے بند ہے۔
یو این آئی۔ ایم جے