نوئیڈا ،18 اپریل(یو این آئی ) معروف تعلیمی ادارے آئی ایم ایس ڈیزائن اینڈ انوویشن اکیڈمی (آ ئی ایم ایس ، ڈی آئی اے) کی جانب سے 'اوپن ڈے 2026' کا کامیابی کے ساتھ انعقاد کیا گیا اس تقریب میں ڈیزائننگ کی دنیا میں کریئر بنانے کے خواہش مند طلبہ، اساتذہ اور والدین کی ایک بڑی تعداد نے بھرپور جوش و خروش کے ساتھ شرکت کی پروگرام کے دوران شرکاء کے لیے فیشن، جیولری، انٹیریئر، کمیونی کیشن، لگژری پروڈکٹ ڈیزائن اور فاؤنڈیشن جیسے شعبوں میں لائیو ورکشاپس منعقد کی گئیں۔ ان ورکشاپس میں طلبہ نے نہ صرف تخلیقی عمل کو قریب سے دیکھا بلکہ خود بھی عملی طور پر حصہ لے کر ڈیزائننگ کی باریکیوں کو سمجھا۔
اکیڈمی کے وائس پریذیڈنٹ چراغ گپتا نے تقریب سے خطاب کرتے ہوئے کہا "ہمارا مقصد صرف کتابی علم فراہم کرنا نہیں، بلکہ طلبہ کو مستقبل کے چیلنجز اور ابھرتے ہوئے مواقع کے لیے تیار کرنا ہے۔ ہم نئی تعلیمی پالیسی کے تحت 'اسکل بیسڈ لرننگ' اور 'کریئیٹو ایجوکیشن ماڈل' پر خصوصی توجہ دے رہے ہیں۔"
انہوں نے مزید بتایا کہ ادارہ اسکولوں کے ساتھ شراکت داری کر رہا ہے تاکہ ابتدائی سطح سے ہی بچوں میں 'ڈیزائن تھنکنگ' اور اختراعی سوچ پیدا کی جا سکے۔
اکیڈمی کے ڈین پروفیسر (ڈاکٹر) ایم کے وی نائر نے بتایا کہ پروگرام کا مرکز 'پینل ڈسکشن' رہا۔ ڈیزائننگ پر آرٹیفیشل انٹیلی جنس ، فری لانسنگ، ملازمت اور کاروبار کے درمیان انتخاب موضوع بحث رہا۔
ماہرین کا ماننا تھا کہ ڈیزائن انڈسٹری تیزی سے بدل رہی ہے اور نوجوانوں کے لیے اس میں ترقی کے بے شمار مواقع موجود ہیں۔ طلبہ کو صنعت کی ضرورت کے مطابق جدید لیبس اور ماہرانہ رہنمائی فراہم کی جا رہی ہے تاکہ وہ محض نظریاتی علم تک محدود نہ رہیں بلکہ 'پروجیکٹ بیسڈ لرننگ' کے ذریعے پیشہ ورانہ مہارت حاصل کر سکیں۔
یو این آئی۔ م الف