ترواننت پورم، 23 جنوری (یو این آئی) وزیر اعظم نریندر مودی نے جمعہ کو اس عزم کا اظہار کیا کہ اگر کیرالہ میں بھارتیہ جنتا پارٹی (بی جے پی) برسراقتدار آتی ہے تو سبری مالا ایپا مندر سے وابستہ سونے کی مبینہ چوری یا نقصان کے ذمہ داروں کو جیل بھیجا جائے گا۔ انہوں نے اسے عقیدت مندوں کے لیے اپنی ذاتی گارنٹی قرار دیا بی جے پی کی قیادت والے قومی جمہوری اتحاد (این ڈی اے) کی انتخابی مہم کے سلسلے میں یہاں ایک بڑے عوامی جلسے سے خطاب کرتے ہوئے، وزیر اعظم مودی نے حکمراں لیفٹ ڈیموکریٹک فرنٹ (ایل ڈی ایف) پر عقیدت مندوں کے اعتماد کو ٹھیس پہنچانے کا الزام لگایا۔ انہوں نے کہا کہ یہ معاملہ محض انتظامیہ کا نہیں بلکہ عقیدے کا ہے اور یقین دلایا کہ بی جے پی حکومت جوابدہی سختی سے طے کرے گی۔
مندر کی عمارتوں سے وابستہ سونے کی مبینہ گمشدگی کی جاری تحقیقات کا حوالہ دیتے ہوئے وزیر اعظم نے کہا کہ اس معاملے کی جامع تحقیقات کرائی جائیں گی اور تمام مجرموں کو قید کی سزا دی جائے گی۔ واضح رہے کہ اس کیس کی تحقیقات اس وقت ہائی کورٹ کی کڑی نگرانی میں کیرالہ پولیس کی ایک خصوصی تحقیقاتی ٹیم (ایس آئی ٹی) کر رہی ہے۔
مودی نے ایل ڈی ایف اور اپوزیشن یونائیٹڈ ڈیموکریٹک فرنٹ (یو ڈی ایف) دونوں پر سخت تنقید کرتے ہوئے الزام لگایا کہ دہائیوں کی بدانتظامی اور بدعنوانی نے کیرالہ کی ترقی کی راہ میں رکاوٹیں کھڑی کی ہیں۔ انہوں نے دعویٰ کیا کہ بدعنوانی کوآپریٹو بینکوں تک پھیل چکی ہے، جس کے نتیجے میں غریب اور متوسط طبقے کا نقصان ہوا ہے۔ وزیر اعظم مودی نے کہا،’’بی جے پی کو ایک موقع دیں اور عوام سے چھینا گیا ایک ایک روپیہ واپس لایا جائے گا۔‘‘
وزیر اعظم نے ترواننت پورم کارپوریشن میں بی جے پی کی حالیہ جیت کو تاریخی قرار دیتے ہوئے اسے ایک سنگ میل قرار دیا جو کیرالہ میں پارٹی کی بڑھتی ہوئی مقبولیت کی عکاسی کرتا ہے۔ انہوں نے کہا کہ یہ جیت بدعنوانی کے خلاف عوامی مینڈیٹ ہے اور ’وِکست کیرالہ‘کی تعمیر کی طرف ایک قدم ہے۔ انہوں نے مزید کہا کہ ترواننت پورم نے کیرالہ میں بی جے پی کی حکومت سازی کے لیے اسٹیج تیار کر دیا ہے، جس کے اثرات ریاست سے باہر پورے ملک میں محسوس کیے جائیں گے۔
اس موقع پر نئی ریل خدمات اور بنیادی ڈھانچے کے منصوبوں سمیت کئی ترقیاتی اقدامات کا آغاز اور اعلان بھی کیا گیا، جس نے ریاست میں ترقی اور صاف ستھری انتظامیہ کے بی جے پی کے انتخابی بیانیے کو مزید تقویت دی۔
یو این آئی- م ک