لکھنؤ: 24 جون (یو این آئی) مرکزی وزیر داخلہ امت شاہ نے منگل کو کہا کہ 2047 تک ترقی یافتہ ہندوستان کی تعمیر کے وزیر اعظم نریندر مودی کے ہدف کو حاصل کرنے میں سنٹرل زونل کونسل کی ریاستوں کا اہم رول ہے۔
یہاں سنٹرل زونل کونسل کے 25ویں اجلاس کی صدارت کرتے ہوئے شاہ نے کہا کہ سنٹرل زونل کونسل واحد علاقائی کونسل ہے جہاں دو رکن ریاستوں کے درمیان کسی قسم کا کوئی مسئلہ یا تنازع نہیں ہے اور یہ ایک بڑی کامیابی ہے۔ اتر پردیش کے وزیر اعلی یوگی آدتیہ ناتھ، اتراکھنڈ کے وزیر اعلی پشکر سنگھ دھامی، مدھیہ پردیش کے وزیر اعلی موہن یادو اور چھتیس گڑھ کے وزیر اعلی وشنو دیو سائی نے میٹنگ میں شرکت کی۔
میٹنگ میں رکن ریاستوں کے سینئر وزراء، مرکزی داخلہ سکریٹری، بین ریاستی کونسل سکریٹریٹ کے سکریٹری، رکن ریاستوں کے چیف سکریٹریز اور ریاستی اور مرکزی وزارتوں اور محکموں کے دیگر سینئر عہدیداروں نے بھی شرکت کی۔
انہوں نے کہا کہ 2004-14 کے دوران زونل کونسلز کے صرف 11 اجلاس اور زونل کونسلز کی سٹینڈنگ کمیٹیوں کے 14 اجلاس منعقد ہوئے جبکہ 2014-25 کے دوران زونل کونسلز کے 28 اور زونل کونسلز کی سٹینڈنگ کمیٹیوں کے 33 اجلاس منعقد ہوئے جو کہ مجموعی طور پر 2 گنا اضافہ ہے۔
ساتھ ہی انہوں نے یہ بھی واضح کیا کہ اب تک ان ملاقاتوں میں 1287 مسائل حل ہو چکے ہیں جو کہ اپنے آپ میں تاریخی اور حوصلہ افزا ہے۔
میٹنگ میں وزیر داخلہ نے رکن ریاستوں کی گرام پنچایتوں کی آمدنی بڑھانے اور اس کے لیے اصول بنانے کو بھی کہا۔ انہوں نے کہا کہ ہندوستان کا تین درجے کا جمہوری پنچایتی راج نظام صرف پنچایتوں کی آمدنی میں اضافہ سے ہی زیادہ موثر ہوگا۔اجلاس میں قومی اہمیت کے وسیع موضوعات سمیت کل 19 امور پر تبادلہ خیال کیا گیا۔
یواین آئی۔ولی