گورکھپور، 29 اپریل (یو این آئی) وزیر اعلیٰ یوگی آدتیہ ناتھ نے کہا کہ ملک میں 2014 سے پہلے کی حکومت کے ایجنڈے میں ملک نہیں تھا۔ اسی طرح 2017 سے پہلے عام عوام اتر پردیش حکومت کے ایجنڈے میں نہیں تھے۔ ان حکومتوں کا واحد ایجنڈا ووٹ بینک تھا۔ ملک اور ریاست کی جو حالت زار ان پچھلی حکومتوں نے اپنے ووٹ بینک ایجنڈے کی وجہ سے پیدا کی تھی وہ سب کے سامنے ہے۔
یوگی نے منگل کو چارگانوا میں میونسپل کارپوریشن کے گاربیج ٹرانسفر اسٹیشن (جی ٹی ایس) کا افتتاح کرنے کے بعد اجتماع سے خطاب کر رہے تھے۔ نیشنل ایئر کلین پروگرام کے تحت میونسپل کارپوریشن کے اس کچرا ٹرانسفر اسٹیشن کی تعمیر کی کل لاگت 9.89 کروڑ روپے ہے۔جی ٹی ایس کی افتتاحی تقریب میں وزیر اعلیٰ نے کہا کہ وزیر اعظم نریندر مودی کے ویژن کے مطابق ہر فرد کو معیار زندگی فراہم کرنے کے لیے جو کام ملک میں 2014 سے اور ریاست میں 2017 سے ہو رہا ہے، وہ پہلے بھی کیا جا سکتا تھا۔ لیکن پھر اقتدار میں ایسے لوگ تھے جو کچھ نہ کر سکے۔
وزیراعلیٰ نے کہا کہ کوئی بھی کام کرنے کے لیے وژن کی ضرورت ہوتی ہے۔ وژن کو حقیقت تک پہنچانے کے لیے مضبوط قوت ارادی اور ایمانداری سے کام کرنے کے رجحان کی ضرورت ہے۔ وژن کو نتیجہ میں بدلنے کے لیے ٹیم ورک کی ضرورت ہوتی ہے۔ لیکن جہاں خاندان ہی سب کچھ سمجھا جاتا ہے وہاں اقتدار میں رہنے والوں سے کسی قسم کی توقع رکھنا بے معنی ہے۔انہوں نے کہا کہ 2017 سے پہلے ریاست میں ایس پی اور 2014 سے پہلے مرکز میں کانگریس اور اس کی حلیف جماعتیں یہی بے ایمانی کرتی رہیں۔
یوگی نے کہا کہ پہلے سڑکوں اور نالوں میں کچرا پھینکنے کی وجہ سے پانی کی نکاسی ممکن نہیں تھی۔ سڑک پر ہر طرف گندگی پھیلی ہوئی تھی۔ گندگی کی وجہ سے مچھروں کی افزائش ہوتی ہے جس سے انسیفلائٹس، ڈینگو اور ملیریا جیسی بیماریاں جنم لیتی ہیں۔ مچھر اور بیماریاں بڑھیں گی تو مافیا بھی پنپے گا۔ 2017 سے پہلے گندگی، مچھر، بیماری اور مافیا گورکھپور کی پہچان بن چکے تھے۔جبکہ آج کا گورکھپور، ایک اسمارٹ سٹی کے طور پر، صفائی کے لیے ٹھوس اور مائع کچرے کے انتظام کے نئے ماڈل پیش کر رہا ہے۔
انہوں نے کہا کہ 1977-78 تک چار دہائیوں میں 50 ہزار معصوم بچے انسیفلائٹس کی وجہ سے موت کے منہ میں چلے گئے۔ آج ریاست میں 2017 میں بننے والی ڈبل انجن حکومت کی کوششوں سے انسیفلائٹس پوری طرح قابو میں ہے۔ اکتوبر 2014 میں پی ایم مودی کے ذریعہ شروع کیے گئے سوچھ بھارت مشن کا انسیفلائٹس پر قابو پانے میں اہم کردار ہے۔ انسیفلائٹس پر قابو پا کر ہزاروں بچوں کا مستقبل محفوظ بنایا گیا ہے۔وزیر اعلیٰ نے کہا کہ آج لوگوں کو بیماریوں سے بچانے اور صاف ستھرا ماحول فراہم کرنے کے لیے ہر گھر میں بیت الخلاء بنائے گئے ہیں، گھر گھر کوڑا اٹھانے کا کام کیا جا رہا ہے اور ہر گھر میں نل کے پانی کی سہولت فراہم کی جا رہی ہے۔
وزیر اعلیٰ نے کہا کہ گورکھپور میں ویسٹ مینجمنٹ کا بہترین کام ہو رہا ہے۔ یہاں تعمیراتی فضلے سے ٹائلیں بنائی جارہی ہیں۔ سوتھانی میں 500 ٹن یومیہ صلاحیت کا ویسٹ ٹو چارکول پلانٹ لگایا جا رہا ہے۔ اسی سلسلے میں چارگانوا میں 200 ٹن یومیہ کی گنجائش والا کوڑا منتقل کرنے کا اسٹیشن بنایا گیا ہے۔ چالیس وارڈز کا کچرا یہاں ٹھکانے لگایا جائے گا۔ اسی طرح کا کچرا منتقل کرنے کا اسٹیشن لال دیگھی میں بھی بنایا گیا ہے۔ گورکھپور میں قدرتی طریقوں سے پانی صاف کرنے کا ایک نیا ماڈل بھی قائم کیا گیا ہے۔
یواین آئی۔ولی