نئی دہلی، 12 جون (یو این آئی) لوک سبھا میں اپوزیشن کے لیڈر راہل گاندھی نے بین الاقوامی سمندری حدود میں تین دنوں کے اندر تین جہازوں پر ہوئے امریکی حملوں میں تین ہندوستانی ملاحوں کی موت پر تشویش کا اظہار کرتے ہوئے کہا ہے کہ اس معاملے میں وزیراعظم نریندر مودی کی خاموشی حیران کن ہے اور انہیں اپنی خاموشی توڑنی چاہیے مسٹر گاندھی نے جمعہ کو سوشل میڈیا پلیٹ فارم ’ایکس‘ پر لکھا، ”بین الاقوامی سمندری حدود میں تین دن میں تین جہازوں پر امریکی حملوں میں تین ہندوستانیوں کی موت ہو گئی اور ہمارے ’کمپرومائزڈ پی ایم‘ ایک لفظ تک نہیں بولے۔ جب کوئی غیر ملکی طاقت کسی ہندوستانی کا قتل کرے، تو وزیراعظم کو بولنا پڑتا ہے، لیکن مجال ہے کہ یہ ایک لفظ بول جائیں۔“
انہوں نے کہا کہ اگلے ہفتے ہونے والی جی-7 سربراہی کانفرنس میں مسٹر مودی عالمی رہنماؤں سے ملاقات کریں گے، لیکن جن حملوں میں تین ہندوستانی ملاحوں کی موت ہوئی، ان کے تئیں حکومت کی خاموشی تشویشناک ہے۔ ان کا کہنا تھا، ”اگلے ہفتے جی-7 میں ہمارے ملاحوں کے قتل کے بس چند دنوں بعد مودی جی مسکرائیں گے، گلے ملیں گے اور سمجھوتے کریں گے، مگر ان تین ہندوستانیوں کے لیے ان کے پاس ایک لفظ بھی نہیں ہوگا۔“
مسٹر گاندھی نے الزام لگایا کہ وزیراعظم ان ممالک کو ناراض کرنے کی ہمت نہیں دکھا رہے ہیں، جن کی کارروائی میں ہندوستانی شہریوں کی جان گئی ہے۔ انہوں نے کہا، ”کمپرومائزڈ پی ایم بھارت ماتا کے بیٹوں کی حفاظت نہیں کر سکتے، کیونکہ جنہوں نے ان بیٹوں کی جان لی انہیں ناراض کرنے کی ان میں نہ ہمت ہے اور نہ طاقت۔“
انہوں نے کہا کہ جب کسی غیر ملکی طاقت کی کارروائی میں ہندوستانی شہریوں کی جان جاتی ہے تو وزیراعظم کو اس پر بولنا چاہیے، لیکن اس معاملے میں ان کی طرف سے ایک لفظ بھی نہیں کہا گیا ہے۔
یو این آئی۔ایف اے