نئی دہلی، 24 مارچ (یو این آئی) لوک سبھا میں قائد حزب اختلاف اور کانگریس کے سابق صدر راہل گاندھی نے کہا ہے کہ بھارتیہ جنتا پارٹی (بی جے پی) اور راشٹریہ سویم سیوک سنگھ (آر ایس ایس) نے تعلیم کے میدان میں من مانی کرکے تعلیمی نظام کو تباہ کردیا ہے، لیکن وہ اس کے خلاف طلبہ کے ساتھ لڑ رہے ہیں پیر کو یہاں جنتر منتر پر انڈیا گروپ کے طلبہ ونگ کے زیر اہتمام پارلیمنٹ مارچ کے دوران منعقدہ ایک مظاہرے سے خطاب کرتے ہوئے مسٹر گاندھی نے کہا کہ آج بی جے پی-آر ایس ایس کے لوگ تعلیمی اداروں پر قبضہ کر رہے ہیں اور اسی کا نتیجہ ہے کہ ملک کی زیادہ تر یونیورسٹیوں کے وائس چانسلر آر ایس ایس کے لوگ ہیں اور وہ ملک کے تعلیمی نظام کو برباد کر رہے ہیں۔
انہوں نے کہا کہ آر ایس ایس-بی جے پی کے لوگ طلباء کے ساتھ امتیازی سلوک کر رہے ہیں اور پیپر لیک جیسے واقعات کو انجام دیا جا رہا ہے۔ بچے پیپر لیک کے خلاف آواز اٹھاتے ہیں لیکن ان کے مطالبات کو نظر انداز کیا جاتا ہے۔ آر ایس ایس کے نظریات کے لوگ جو چاہیں کر رہے ہیں۔ انہوں نے کہا کہ اس وقت تعلیمی میدان میں دھاندلی اور کرپشن اپنے عروج پر ہے۔ ایسے میں طلباء کی ذمہ داری ہے کہ وہ ہر ظلم کے خلاف آواز اٹھائیں اور پوری طاقت سے لڑیں اور وہ ان کے ساتھ کھڑے ہیں۔
لوک سبھا میں قائد حزب اختلاف نے کہاکہ "آج آر ایس ایس ہندوستان کے مستقبل اور اس کے تعلیمی نظام کو تباہ کرنے میں لگی ہوئی ہے، اگر ہمارا تعلیمی نظام آر ایس ایس کے ہاتھ میں چلا گیا تو ملک میں کسی کو روزگار نہیں ملے گا اور ملک برباد ہو جائے گا۔ آج ہندوستان کی یونیورسٹیوں میں تمام وائس چانسلر آر ایس ایس کے ذریعے منتخب کیے گئے ہیں، آنے والے وقتوں میں یہ وائس چانسلرز بھی ریاستی انتخابات کے لیے خطرناک ثابت ہوں گے۔ ملک کے لیے اور ہمیں اسے روکنا ہو گا۔
یواین آئی۔ظ ا