RegionalPosted at: Aug 17 2026 3:02PM ہندوستانی بچپن اور ملک کا مستقبل خطرے میں، تعلیمی و طبی نظام میں اصلاح ضروری: رام دیو
رائے پور، 17 اگست (یو این آئی) یوگ گرو بابا رام دیو نے ملک کے تعلیمی اور طبی نظام میں اصلاح کی ضرورت پر زور دیتے ہوئے کہا ہے کہ موجودہ وقت میں کسی مذہب یا ذات سے زیادہ ہندوستانی بچپن، ملک کی جوانی، حال اور مستقبل خطرے میں ہے بھوپال سے دہرادون کے سفر کے دوران دہرادون میں خراب موسم کے باعث بابا رام دیو اتوار کو رائے پور پہنچے اور یہاں رات قیام کیا۔ وہ پیر کی صبح دہرادون کے لیے روانہ ہوئے۔ رائے پور ہوائی اڈے پر اتوار کی دیر رات میڈیا سے گفتگو کے دوران انہوں نے ملک کی موجودہ صورت حال، تعلیم، طب، نوجوانوں کے مستقبل اور قومی مفاد سے متعلق مختلف امور پر اپنی بات رکھی۔
رام دیو نے کہا، 'ملک میں نہ ہندو، نہ مسلمان، نہ کشتریہ، نہ برہمن سمیت کوئی دوسری ذات خطرے میں ہے۔ خطرے میں ہندوستانی بچپن ہے۔ ملک کی جوانی، ملک کا حال، ملک کا مستقبل خطرے میں ہے۔ کچھ لوگ تحریکوں کے لیے ملک کے بچپن کا استعمال کر رہے ہیں۔ آئین اور جمہوریت کے تحفظ کے لیے تحریک ہونی چاہیے۔
کانگریس کی اعلیٰ قیادت پر قومی ترانے کی توہین کے الزام کو لے کر جاری سیاسی تنازع کے بارے میں انہوں نے کہا کہ انہوں نے متعلقہ ویڈیو ابھی تک نہیں دیکھی ہے۔ رام دیو نے کہا، 'وندے ماترم سے لے کر ملک کی یکجہتی اور سالمیت کا سوال ہے۔ اس معاملے پر سب کو متحد ہونا چاہیے۔ اس پر سیاست نہیں ہونی چاہیے۔ قومی مفاد اور قومی دھرم سب سے مقدم ہے۔'
ملک کے موجودہ نظام اور وزیراعظم نریندر مودی کی پالیسیوں کے بارے میں پوچھے گئے سوال پر رام دیو نے کہا، 'صرف ایک وزیر اعظم ملک کو درست کر دیں گے، یہ توقع بھی پوری طرح مناسب نہیں ہے۔ نریندر مودی کی پالیسیوں سے ملک میں بہت کچھ اچھا ہوا ہے۔ بہت سے لوگوں کو بہت کچھ اچھا نظر نہیں آتا، یہ غلط ہے۔ ملک میں سب کچھ اچھا ہے، یہ بات بھی غلط ہے۔ ہمیں ہمیشہ انصاف پسندانہ نقطۂ نظر سے سوچنا چاہیے۔'
انہوں نے کہا کہ ملک میں مسئلہ صرف ملازمتوں کا نہیں ہے، بلکہ ماحولیات سمیت دیگر مسائل بھی اہم ہیں۔ تعلیم کی تجارت کاری کو برا قرار دیتے ہوئے انہوں نے کہا، 'اگر ملک کی تعلیم اور طبی نظام کو بہتر بنانا ہے تو سرکاری نظام سے فائدہ اٹھانے والوں کو توجہ دینی چاہیے۔ سرکاری نظام سے فائدہ اٹھانے والوں کے بچوں کو سرکاری اسکول میں پڑھنا اور سرکاری اسپتال میں علاج کرانا چاہیے۔ نظام کو بہتر بنانے کے لیے معاشرے کے تمام لوگوں کو مل کر کوشش کرنے کی ضرورت ہے۔'
یو این آئی۔ ایم جے