نئی دہلی، 18 اپریل (یو این آئی) دہلی کی وزیر اعلیٰ ریکھا گپتا نے لوک سبھا میں 131 ویں آئینی ترمیمی بل کے پاس نہ ہونے کو خواتین کے حقوق کے ساتھ سراسر ناانصافی قرار دیا ہے محترمہ گپتا نے ہفتہ کے روز یہاں کنفیڈریشن آف آل انڈیا ٹریڈرز (سی اے آئی ٹی) کے زیر اہتمام منعقدہ سمٹ میں کہا کہ 17 اپریل کو پارلیمنٹ میں جو کچھ ہوا، وہ ہر اس خاتون کے لیے تکلیف دہ اور مایوس کن ہے جو اپنے حقوق اور وقار کی امید رکھتی ہے۔ انہوں نے کہا کہ وزیر اعظم نریندر مودی نے ملک کی بیٹیوں کو ملک کی تعمیر میں شراکت داری دینے کے لیے 'ناری شکتی وندن ادھینیم' پیش کیا، جو خواتین کو فیصلہ سازی کے مرکزی دھارے میں لانے کی سمت میں ایک تاریخی اور انقلابی قدم تھا۔ لیکن افسوس کہ کچھ جماعتوں نے اس تاریخی موقع کو بھی تنگ نظر سیاست کی نظر سے دیکھا اور خواتین کے حقوق کی مخالفت کرنے میں کوئی ہچکچاہٹ محسوس نہیں کی۔
انہوں نے کہا کہ ایک خاتون وزیر اعلیٰ ہونے کے ناطے یہ موضوع ان کے لیے محض سیاست کا نہیں بلکہ ہمدردی اور احترام کا معاملہ ہے۔ ملک کی کروڑوں خواتین کو فیصلہ سازی کے عمل میں شرکت کا اہم موقع ان سے چھین لیا گیا ہے۔ پارلیمنٹ میں جن جماعتوں نے خواتین کے ریزرویشن کی مخالفت کی، ان کے دلائل کے پیچھے کوئی ٹھوس بنیاد نہیں تھی، بلکہ صرف خواتین مخالف ذہنیت واضح طور پر نظر آئی۔ وزیر اعلیٰ نے واضح طور پر کہا کہ جن رہنماؤں نے خواتین کے ریزرویشن کی مخالفت کی ہے، ان کے علاقوں میں ہماری بہنیں اور بیٹیاں ان سے جواب طلب کریں گی۔
وزیر اعلیٰ نے کہا کہ یہ پہلی بار نہیں ہے جب کانگریس اور اس کے اتحادیوں نے خواتین کے حقوق کی راہ میں رکاوٹیں کھڑی کی ہیں۔ ان کی یہ سوچ خواتین کی خودمختاری کے حوالے سے ان کی اصل نیت کو ظاہر کرتی ہے۔ انہوں نے یقین ظاہر کیا کہ ملک کی خواتین سب کچھ دیکھ رہی ہیں اور سمجھ رہی ہیں کہ ناری شکتی کے ساتھ ہونے والی یہ ناانصافی رائیگاں نہیں جائے گی۔ انہوں نے پختہ لہجے میں کہا کہ اب ملک بدل چکا ہے، ناری شکتی انتظار نہیں کرے گی بلکہ اپنا حق چھین کر رہے گی۔
انہوں نے مزید کہا کہ ہندوستان کا اسٹارٹ اپ ایکو سسٹم بے مثال بلندیوں کی طرف گامزن ہے، جس میں خواتین کاروباریوں کی شرکت مسلسل بڑھ رہی ہے۔ آج ہندوستانی خواتین اسمال بزنس، اسٹارٹ اپس، ڈیجیٹل پلیٹ فارمز اور عالمی منڈیوں تک اپنی مضبوط موجودگی درج کروا رہی ہیں، جو ملک کے لیے فخر کی بات ہے۔ ہندوستان کی خواتین صرف حصہ ہی نہیں لے رہیں بلکہ قیادت کر رہی ہیں اور اقتصادی ترقی کا محور بن رہی ہیں۔ ان کی جدت طرازی، خود انحصاری اور قائدانہ صلاحیتیں ملک کو نئی سمت دے رہی ہیں۔
یواین آئی ۔ایف اے