نئی دہلی، 10 اگست ( یواین آئی ) دہلی کی وزیراعلیٰ ریکھا گپتا نے 'ودیا واہنی یوجنا' کے تحت پیر کے روز اسمبلی احاطے میں نویں جماعت میں زیر تعلیم طالبات کو سائیکلیں تقسیم کیں اس دوران محترمہ گپتا نے طالبات سے بات چیت کرتے ہوئے انہیں سائیکل ملنے پر مبارکباد دی انہوں نے کہا کہ ایک سائیکل صرف آمد و رفت کا ذریعہ نہیں، بلکہ بیٹیوں کی تعلیم اور ان کے خوابوں کو آگے بڑھانے کا ذریعہ ہے۔ حکومت کی کوشش ہے کہ کسی بھی بیٹی کو اسکول تک پہنچنے میں آنے والی دوری یا ٹرانسپورٹ کا مسئلہ اس کی پڑھائی کی راہ میں رکاوٹ نہ بنے۔ انہوں نے کہا کہ 'ودیا واہنی یوجنا' کے ذریعے دہلی حکومت بیٹیوں کی تعلیم کو مزید آسان اور سہل بنانے کے لیے پرعزم ہے۔ انہوں نے بتایا کہ اس سال نویں جماعت میں پڑھنے والی تقریباً 1.40 لاکھ طالبات کو یوجنا کے تحت سائیکلیں تقسیم کی جا رہی ہیں۔ بیٹیوں کی تعلیم میں کی گئی سرمایہ کاری معاشرے کے روشن مستقبل میں کی گئی سرمایہ کاری ہے۔ حکومت یہ یقینی بنانے کے لیے مسلسل کام کر رہی ہے کہ دہلی کی بیٹیوں کو تعلیم، جدید سہولیات اور آگے بڑھنے کے مساوی مواقع ملیں۔
وزیراعلیٰ نے طالبات کی حوصلہ افزائی کرتے ہوئے کہا کہ وہ اس سہولت کا استعمال اپنی تعلیم کو مزید مضبوط بنانے میں کریں، اپنے اہداف مقرر کریں اور پورے اعتماد کے ساتھ آگے بڑھیں۔ دہلی حکومت کا مقصد طلباء کو بہتر تعلیم کے ساتھ جامع اور اہل ماحول فراہم کرنا ہے تاکہ ہر طالب علم بغیر کسی رکاوٹ کے اپنے خوابوں کی طرف آگے بڑھ سکے۔
اس موقع پر دہلی کے وزیر تعلیم مسٹر آشیش سود نے کہا کہ آج ہماری باصلاحیت طالبات کو سائیکلوں کی تقسیم صرف آمد و رفت کا ذریعہ فراہم کرنے تک محدود نہیں ہے، بلکہ یہ انہیں خود کفیل بنانے، رکاوٹوں کو پار کرنے اور اپنے خوابوں کو شرمندہ تعبیر کرنے کے لیے پر دینے کی سمت میں ایک اہم قدم ہے۔ انہوں نے کہا کہ وہ وزیراعلیٰ کے مسلسل تعاون اور ناری شکتی کے تئیں ان کی اٹوٹ عہد بستگی کے لیے تہہ دل سے شکریہ ادا کرتے ہیں۔ 'ودیا واہنی یوجنا' کے ذریعے حکومت یہ یقینی بنا رہی ہے کہ دہلی کی کوئی بھی طالبہ تعلیم حاصل کرنے کے اپنے سفر میں پیچھے نہ چھوٹے۔
یواین آئی۔ایف اے