واشنگٹن/نئی دہلی/اسلام آباد، 10 مئی (یو این آئی) امریکی صدر ڈونلڈ ٹرمپ نے کہا ہے کہ ہندوستان اور پاکستان فوری اور مکمل جنگ بندی کے لیے تیار ہوگئے ہیں۔
سماجی رابطے کی ویب سائٹ ایکس پر جاری بیان میں امریکی صدر نے اس بات کا انکشاف کیا۔
ایکس پر بیان میں ان کا کہنا تھا کہ امریکہ نے رات بھر ثالثی کی اور مجھے یہ اعلان کرتے ہوئے خوشی ہو رہی ہے کہ ہندوستان اور پاکستان نے مکمل اور فوری جنگ بندی پر اتفاق کیا ہے۔
امریکی صدر ڈونلڈ ٹرمپ نے کہا کہ کامن سینس اور عظیم ذہانت کے استعمال پر دونوں ممالک کو مبارکباد۔
ان کا کہنا تھا کہ اس معاملے پر آپ کی توجہ کا شکریہ!
ادھر، امریکی وزیر خارجہ مارکو روبیو نے ایکس پر بتایا کہ گزشتہ 48 گھنٹوں کے دوران امریکی نائب صدر اور میں نے سینئر ہندوستانی اور پاکستانی عہدیداروں کے ساتھ بات چیت کی، جن میں وزیر اعظم نریندر مودی اور شہباز شریف، وزیر خارجہ سبرامنیم جے شنکر، چیف آف آرمی اسٹاف عاصم منیر، اور قومی سلامتی کے مشیر اجیت ڈووال اور عاصم ملک شامل ہیں۔
انہوں نے کہا کہ مجھے یہ اعلان کرتے ہوئے خوشی ہو رہی ہے کہ پاکستان اور ہندوستان نے فوری جنگ بندی پر اتفاق کیا ہے اور ایک نیوٹرل مقام پر وسیع مسائل پر بات چیت شروع کر دی۔
دریں اثنا، نائب وزیراعظم اور وزیر خارجہ اسحٰق ڈار نے بتایا کہ سیز فائر کا اطلاق فوری ہوگا۔
سماجی رابطے کی ویب سائٹ پر جاری بیان میں ان کا کہنا تھا کہ پاکستان اورہندوستان نے فوری طور پر جنگ بندی پر اتفاق کیا ہے، پاکستان نے ہمیشہ اپنی خودمختاری اور علاقائی سالمیت پر سمجھوتہ کیے بغیر خطے میں امن و سلامتی کے لیے کوششیں کی ہیں۔
بعد ازاں، ہندوستانی خارجہ سکریٹری وکرم مسری نے ایک بیان میں جنگ بندی کی تصدیق کر دی۔انہوں نے کہا کہ پاکستان کے ڈائریکٹر جنرل ملٹری آپریشنز کا ہندوستان کے ڈائریکٹر جنرل ملٹری آپریشنز سے سہ پہر 3 بج کر 35 منٹ پر رابطہ ہوا۔ انہوں نے اتفاق کیا ہے کہ دونوں فریق تمام قسم کی فائرنگ اور زمینی، بحری اور فضائی فوجی کارروائیاں روک دیں گے۔انہوں نے کہا کہ اس جنگ بندی کا اطلاق آج شام 5 بجے سے ہوگا، دونوں فریقین کو ہدایت جاری کر دی گئی ہیں۔
قبل ازیں ترجمان وائٹ ہاؤس کیرولین لیویٹ نے نیوز بریفنگ میں کہا کہ امریکی وزیرخارجہ مارکوروبیوہند۔پاک کشیدگی پر متحرک ہیں، امریکی وزیر خارجہ نے دونوں ممالک کے رہنماؤں سے بات کی ہے ، مارکو رووبیو نے دونوں ممالک سے تنازع کے خاتمے پر بات کی۔ترجمان وائٹ ہاؤس کا کہنا تھا کہ صدر ٹرمپ بھی ہند۔پاک معاملے پر بات کرچکے ہیں، صدر ٹرمپ چاہتے ہیں کشیدگی نہ بڑھے اور یہ معاملہ جلد ختم ہو۔
یو این آئی۔ ع ا۔