ممبئی 15 جون (یو این آئی) ایران اور امریکہ کے درمیان امن معاہدہ ہونے کی خبر سے گھریلو شیئر بازاروں میں پیر کو زبردست تیزی دیکھی گئی اور بی ایس ای کا سینسیکس ابتدائی کاروبار میں 1300 پوائنٹس کے قریب اچھل گیاسینسیکس 1197.32 پوائنٹس کے اضافے کے ساتھ 76725.27 پوائنٹس پر کھلا اور 1293 پوائنٹس کی تیزی کے ساتھ 76821 پوائنٹس پر پہنچ گیا۔ خبر لکھے جانے کے وقت یہ 1036.56 پوائنٹس (1.37 فیصد) کی مضبوطی کے ساتھ 76564.51 پوائنٹس پر تھا۔ امریکہ کے صدر ڈونلڈ ٹرمپ نے اتوار کو اعلان کیا کہ ایران کے ساتھ امن مذاکرات کو حتمی شکل دے دی گئی ہے۔ اس میں لبنان سمیت تمام محاذوں پر حملے روکنے اور ہرمز آبنائے کو تمام تجارتی جہازوں کے لیے فوری طور پر کھولنے کے بھی التزامات ہیں۔ امن معاہدے پر 19 جون کو سوئٹزرلینڈ میں ایک رسمی تقریب میں دستخط ہوں گے۔
اس خبر کے بعد دنیا بھر کے شیئر بازاروں میں تیزی دیکھی جا رہی ہے جبکہ ڈالر اور خام تیل دباؤ میں ہیں۔ جاپان کا نکی پانچ فیصد چڑھ گیا ہے۔ ڈالر کے مقابلے روپیہ 55 پیسے مضبوط ہوا ہے۔ چوطرفہ خریداری کے درمیان نیشنل اسٹاک ایکسچینج کا نفٹی-50 انڈیکس بھی 361.95 پوائنٹس چڑھ کر 23984.85 پوائنٹس پر کھلا۔ خبر لکھے جانے کے وقت یہ 314.55 پوائنٹس یعنی 1.33 فیصد اوپر 23937.45 پوائنٹس پر تھا۔
تمام سیکٹروں میں اس وقت خریداری چل رہی ہے۔ آٹو، بینکنگ، فائنانس، رئیلٹی، پائیدار اشیائے صرف، تیل و گیس اور سیمنٹ سیکٹروں میں زیادہ تیزی رہی۔ سینسیکس کی کمپنیوں میں انڈیگو کا شیئر چار فیصد سے زیادہ کے اضافے میں ہے۔ ایٹرنل، ایل اینڈ ٹی اور بجاج فن سرو کے شیئر تین سے چار فیصد کے درمیان اوپر چل رہے ہیں۔ بجاج فائنانس، الٹراٹیک سیمنٹ، ٹرینٹ اور ماروتی سوزوکی میں دو سے تین فیصد تک کی تیزی ہے۔ سن فارما فی الحال سرخ نشان میں ہے۔
یو این آئی۔ٓ ایم جے