نئی دہلی، 17 مارچ (یو این آئی) جسٹس جوائےمالیہ باگچی نے پیر کو سپریم کورٹ کے جج کے طور پر حلف لیا۔
سپریم کورٹ کے چیف جسٹس سنجیو کھنہ نے دیگر تمام ججوں کی موجودگی میں انہیں حلف دلایا۔ سپریم کورٹ کے احاطے میں منعقدہ تقریب حلف برداری میں دیگر ججز کے علاوہ دیگر معززین بھی موجود تھے۔
جسٹس باگچی کی حلف برداری کے ساتھ ہی عدالت عظمیٰ میں ججوں کی تعداد 34 کے مقابلے میں 33 ہو گئی ہے۔
جسٹس باگچی 2 اکتوبر 2031 کو رٹائر ہو جائیں گے، اس سے پہلے وہ مئی (2031) میں چیف جسٹس آف انڈیا بن سکتے ہیں۔
جسٹس کھنہ کی سربراہی میں اور جسٹس بھوشن آر گوئی، جسٹس سوریہ کانت، جسٹس ابھے ایس اوکا اور جسٹس وکرم ناتھ پر مشتمل کالجیم نے 6 مارچ کو جسٹس باگچی کو سپریم کورٹ کے جج کے طور پر ترقی دینے کی سفارش کی تھی۔
تقرری کی سفارش کے لیے جج کے عہدے کے لیے ممکنہ امیدواروں کا جائزہ لیتے ہوئے، کالجیم نے امیدواروں کی میرٹ، دیانتداری اور عدالتی قابلیت کے علاوہ علاقائی نمائندگی اور سنیارٹی جیسے پہلوؤں پر بھی غور کیا۔
جسٹس باغچی کو قانون کے مختلف شعبوں میں ہائی کورٹ کے جج کے طور پر 13 سال کا وسیع تجربہ ہے۔ انہیں جون 2011 میں کلکتہ ہائی کورٹ کا جج مقرر کیا گیا تھا۔ جنوری 2021 میں ان کا تبادلہ آندھرا پردیش ہائی کورٹ اور پھر نومبر 2021 میں کلکتہ ہائی کورٹ میں کیا گیا۔
10 مارچ کو مرکزی حکومت نے جسٹس باگچی کی سپریم کورٹ کے جج کے طور پر تقرری کا اعلان کیا تھا۔
محکمہ انصاف، مرکزی وزارت قانون و انصاف نے 10 مارچ کو کلکتہ ہائی کورٹ کے جج جسٹس باگچی کی ترقی کا اعلان کرتے ہوئے ایک نوٹیفکیشن جاری کیاتھا۔
یواین آئی، م ش