تیونس، 21 جنوری (یو این آئی) تیونس میں 1950 کے بعد ہوئی شدید بارش کے نتیجے میں آئے سیلاب کے باعث کم از کم چار افراد کی موت ہو گئی ہے۔
تیونس کی سرکاری خبر رساں ایجنسی ٹیونس افریقہ پریس (ٹی اے پی) نے منگل کو اپنی رپورٹ میں بتایا کہ یہ ہلاکتیں پیر کی شام سے منگل کے درمیان مشرقی ساحلی صوبے موناسٹیر کے موکنین شہر میں ہوئیں، جہاں 230 ملی میٹر بارش درج کی گئی۔ شہری تحفظ (سول پروٹیکشن) کے محکمے کے افسر خلیل مشری نے بتایا کہ شہری دفاع کی ٹیموں نے منگل کو مقامی وقت کے مطابق صبح پانچ بجے تک 106 سے زائد امدادی کارروائیاں انجام دیں، جن میں سیلاب زدہ سڑکوں کا معائنہ اور پانی میں پھنسی گاڑیوں کو نکالنا شامل تھا۔
انہوں نے بتایا کہ امدادی ٹیموں نے 15 افراد کو بحفاظت نکالا اور تقریباً 300 دیگر افراد کو سیلاب زدہ وادیوں اور زیرِ آب علاقوں کو عبور کرنے میں مدد فراہم کی، کیونکہ شدید بارش کے باعث دریا اور نالے طغیانی پر تھے، جس سے کئی علاقوں میں سڑکوں پر خطرناک صورتحال پیدا ہو گئی۔
قومی محکمۂ موسمیات نے گریٹر تیونس کے علاقے، نابول اور موناسٹیر کے صوبوں کے لیے اپنے انتباہی نظام میں سب سے اعلیٰ درجے کا “ریڈ الرٹ” جاری کیا ہے۔ افسران نے آٹھ سے زائد گورنریٹس میں اسکول بند کر دیے ہیں اور اہم شاہراہیں بھی بند کر دی گئی ہیں۔
افسران نے شہریوں سے اپیل کی ہے کہ وہ محتاط رہیں، سیلاب کے خدشے والے علاقوں سے گریز کریں اور حفاظتی ہدایات پر عمل کریں، کیونکہ موسلا دھار بارش اور تیز ہوایں چلنے کا امکان ہے۔ مقامی میڈیا کے مطابق، تیونس کے صدر قیس سعید نے فوج کو ملک بھر میں امدادی اور بچاؤ کارروائیوں میں شامل ہونے کی ہدایت دی ہے۔
یو این آئی۔ این یو۔