مسافر گاڑیوں کی فروخت دسمبر میں 27 فیصد بڑھی، سالانہ فروخت نے بھی ریکارڈ بنایا
نئی دہلی، 13 جنوری (یواین آئی) ملک میں مسافر گاڑیوں کی تھوک فروخت دسمبر میں 26.8 فیصد بڑھ کر 3,99,216 یونٹ تک پہنچ گئی۔ مسافر گاڑیوں میں کاریں، یوٹیلیٹی وہیکلز اور وین شامل ہیں مال و خدمات ٹیکس (جی ایس ٹی) میں نئی نسل کی اصلاحات اور ریزرو بینک کی جانب سے ریپو ریٹ میں کمی کے باعث قرض پر سود کم ہونے سے اکتوبر-دسمبر کی پوری سہ ماہی میں مانگ مضبوط رہی، جس کے نتیجے میں سہ ماہی اور سالانہ فروخت کا بھی نیا ریکارڈ قائم ہوا۔
گاڑی ساز کمپنیوں کی تنظیم سیام نے منگل کو جاری اعداد و شمار میں بتایا کہ دسمبر 2025 میں دو پہیہ گاڑیوں کی فروخت 39.4 فیصد بڑھ کر 15,41,036 یونٹ درج کی گئی۔ تین پہیہ گاڑیوں کی فروخت 61,924 یونٹ رہی جو ایک سال پہلے کے مقابلے میں 17.4 فیصد زیادہ ہے۔
اکتوبر-دسمبر سہ ماہی میں مسافر گاڑیوں کی فروخت 20.6 فیصد بڑھ کر 12,76,073 یونٹ رہی، جن میں 8,52,498 یوٹیلیٹی وہیکلز شامل ہیں۔ کاروں کی فروخت 20.5 فیصد، یوٹیلیٹی وہیکلز کی 20.9 فیصد اور وین کی 16.4 فیصد بڑھی۔
سال 2025 کی آخری سہ ماہی میں دو پہیہ گاڑیوں کی فروخت 16.9 فیصد بڑھ کر 56,96,238 یونٹ تک پہنچ گئی۔ تین پہیہ گاڑیوں کی فروخت 2,15,211 یونٹ رہی جو سالانہ بنیاد پر 14 فیصد زیادہ ہے۔ اس دوران کمرشل گاڑیوں کی فروخت میں 21.5 فیصد اضافہ درج کیا گیا اور یہ 2,90,085 یونٹ تک پہنچ گئی۔
پورے سال کے دوران جنوری سے دسمبر تک مسافر گاڑیوں کی کل فروخت پانچ فیصد بڑھ کر 44,89,717 یونٹ تک پہنچ گئی، جو ایک نیا ریکارڈ ہے۔ دو پہیہ گاڑیوں کی فروخت میں 4.9 فیصد اضافہ ہوا اور یہ 2,05,00,639 یونٹ تک پہنچ گئی۔ تین پہیہ گاڑیوں کی فروخت 8.2 فیصد بڑھ کر 7,88,429 یونٹ رہی۔ کمرشل گاڑیوں کی فروخت 7.7 فیصد اضافے کے ساتھ 10,27,877 یونٹ رہی۔
سیام کے صدر شیلش چندر نے اعداد و شمار پر ردعمل ظاہر کرتے ہوئے کہا کہ سال 2025 گاڑیوں کی صنعت کے لیے سنگ میل ثابت ہوا ہے۔ سال کی پہلی ششماہی میں فروخت میں سستی رہی اور صنعت کو سپلائی سے متعلق رکاوٹوں کا سامنا کرنا پڑا۔ پالیسی سے متعلق ڈھانچہ جاتی اصلاحات نے مانگ میں تیزی کی بنیاد رکھی۔ ان اصلاحات میں انکم ٹیکس میں رعایت، ریپو ریٹ میں مسلسل کمی اور جی ایس ٹی 2.0 شامل ہیں۔ جی ایس ٹی کی شرح میں کمی کے باعث گاڑیوں کی لاگت کم ہوگئی جس سے صنعت کو رفتار ملی۔
انہوں نے بتایا کہ پورے سال کے دوران مسافر گاڑیوں، کمرشل گاڑیوں اور تین پہیہ گاڑیوں کی فروخت ریکارڈ سطح پر رہی۔ دو پہیہ گاڑیوں کی فروخت بھی دوسرے بلند ترین سطح پر رہی۔
مسٹر چندر نے سال 2026 میں بھی مانگ میں اضافہ جاری رہنے کی امید ظاہر کی۔
سیام کے ڈائریکٹر جنرل راجیش مینن نے کہا کہ اکتوبر-دسمبر میں مسافر گاڑیوں، دو پہیہ، تین پہیہ اور کمرشل گاڑیوں کی سہ ماہی فروخت کا نیا ریکارڈ بنایا گیا۔
یواین آئی۔ ظ ا