لکھنؤ، 3 جون (یو این آئی) اتر پردیش کی یوگی آدتیہ ناتھ حکومت نے وزراء کے انچارج اضلاع میں بڑا رد و بدل کرتے ہوئے کئی سینئر اور نئے وزراء کو نئی ذمہ داریاں سونپی ہیں حال ہی میں کابینہ میں شامل کیے گئے وزراء کو بھی اہم اضلاع کا انچارج بنایا گیا ہے بی جے پی حکومت کے اس قدم کو سال 2027 کے اسمبلی انتخابات سے قبل تنظیم اور انتظامی ہم آہنگی کو مضبوط کرنے کی حکمتِ عملی کے طور پر دیکھا جا رہا ہے۔ نئے نظام کے تحت سینئر وزیر بھوپیندر چودھری کو آگرہ کے ساتھ کاسگنج ضلع کا اضافی چارج دیا گیا ہے۔ حال ہی میں کابینہ میں شامل ہوئے منوج پانڈے کو سیتاپور کا انچارج بنایا گیا ہے۔ اس کے علاوہ اجیت پال کو فتح پور، سمیندر تومر کو مظفر نگر، ہنس راج وشوکرما کو سون بھدر اور سریندر دلیر کو بلند شہر کی ذمہ داری سونپی گئی ہے۔
کابینہ وزراء میں سوریہ پرتاپ شاہی کو ایودھیا اور بستی، سریش کمار کھنہ کو وارانسی اور لکھنؤ، سواتنتر دیو سنگھ کو پریاگ راج اور گورکھپور، بیبی رانی موریہ کو اٹاوہ اور ہاتھرس، لکشمی نارائن چودھری کو علی گڑھ اور فیروز آباد جبکہ جیویر سنگھ کو جھانسی اور فرخ آباد کا انچارج بنایا گیا ہے۔ اسی طرح دھرم پال سنگھ کو غازی آباد اور رام پور، نند گوپال گپتا نندی کو مرزاپور اور چترکوٹ، انل راج بھر کو اعظم گڑھ اور سدھارتھ نگر، راکیش سچان کو رائے بریلی اور کنوج جبکہ اروند کمار شرما کو جونپور اور بھدوہی کی ذمہ داری دی گئی ہے۔
علاوہ ازیں، یوگیندر اپادھیائے کو کانپور نگر، آشیش پٹیل کو گونڈہ، سنجے نیشاد کو کانپور دیہات، اوم پرکاش راج بھر کو امبیڈکر نگر، دارا سنگھ چوہان کو کشی نگر اور شراوستی، سنیل کمار شرما کو سہارنپور اور انل کمار کو مراد آباد کا انچارج مقرر کیا گیا ہے۔ ریاستی وزیر (آزادانہ چارج) کی سطح پر نتن اگروال کو لکھیم پور کھیری، کپل دیو اگروال کو بجنور، رویندر جیسوال کو غازی پور، سندیپ سنگھ کو متھرا، گلاب دیوی کو امروہا اور گریش چندر یادو کو سلطان پور کا چارج سونپا گیا ہے۔
وہیں دھرم ویر پرجاپتی کو مائن پوری، اسیم ارون کو ہردوئی اور میرٹھ، جے پی ایس راٹھور کو سنبھل اور بریلی، دیا شنکر سنگھ کو دیوریا اور مئو، نریندر کمار کشیپ کو شاہجہاں پور، دنیش پرتاپ سنگھ کو باندا اور بہرائچ، ارون کمار سکسینہ کو بدایوں اور دیا شنکر مشرا دیالو کو بلیا اور مہاراج گنج کا انچارج بنایا گیا ہے۔
حکومت کے اس بڑے پیمانے پر کیے گئے رد و بدل کو آئندہ اسمبلی انتخابات کی تیاریوں کے پیشِ نظر اضلاع میں بہتر ہم آہنگی، عوامی رابطے اور ترقیاتی کاموں کی نگرانی کو مزید مؤثر بنانے کی سمت میں ایک اہم قدم مانا جا رہا ہے۔
یو این آئی۔ م ع