NationalPosted at: Jul 9 2020 11:47PM ملک میں کورونا وائرس سے شفایابی کی شرح 62 فیصد سےزائد
نئی دہلی، 9 جولائی (یو این آئی) کورونا وائرس (کووڈ-19) کی روک تھام اور علاج میں مرکزی اور ریاستی حکومتوں کی کوششوں سے ملک میں کورونا وائرس کی وبا سے شفایابی کی شرح 62.09 ہوگئی ہے۔
جمعرات کے روز مرکزی وزارت صحت و خاندانی بہبود نے کہا کہ گزشتہ 24 گھنٹے کے دوران ملک بھر میں 19،547 مریض کورونا وائرس سے پوری طرح صحت یاب ہوگئے ہیں۔ اس طرح اب تک مجموعی طور پر 4،76،377 افراد اس بیماری سے پوری طرح نجات پاچکے ہيں۔
اس وقت ملک میں کورونا وائرس کے 2،69،789 مریض زیر علاج ہیں۔ اس طرح کورونا وائرس سے صحت یاب ہونے والے افراد کی تعداد زیر علاج مریضوں کے مقابلے میں تقریبا دگنی ہوگئی ہے۔
ملک میں کورونا وائرس کی جانچ کی رفتار تیزی سے بڑھ رہی ہے۔ اس وقت ملک میں 1132 لیباریٹریوں میں کورونا وائرس کی جانچ ہورہی ہے۔
ان تمام لیباریٹریوں نے مل کر گزشتہ 24 گھنٹے میں 2،67،061 نمونوں کی جانچ کی۔ ملک میں اب تک کورونا کے 1،07،40،832 نمونوں کی جانچ کی جا چکی ہے۔
یو این آئی۔ م ش۔ ایف اے۔ 1955