OthersPosted at: Apr 25 2024 2:19PM راہل کی بھارت جوڑو یاترا میں شامل کانگریس لیڈر بی جے پی میں شامل ہو گئے
میسور، 25 اپریل (یو این آئی) ایک اچانک سیاسی پیشرفت میں کرناٹک پردیش کانگریس کے جنرل سکریٹری ڈاکٹر ششروتا گوڑا، جنہوں نے کانگریس کے سابق صدر اور وائناڈ کے ایم پی راہل گاندھی کے ساتھ بھارت جوڑو یاترا کے دوران کنیا کماری سے کشمیر گئے تھے، بدھ کو پارٹی چھوڑ دی اور بھارتیہ جنتا پارٹی (بی جے پی) میں شامل ہوگئے۔
ڈاکٹر گوڑا نے کل بنگلور میں بی جے پی دفتر میں سابق نائب وزیر اعلی سی این اشوتھ نارائن اور بی جے پی کے انتخابی انچارج رادھا موہن داس اگروال کی موجودگی میں بی جے پی میں شمولیت اختیار کی۔
اس موقع پر ڈاکٹر گوڑا نے کہا، ”میرا مقصد عوام کی خدمت کرنا ہے اور میں نے محسوس کیا کہ میرے خواب کو پورا کرنے کے لیے بی جے پی بہترین پارٹی ہے۔“ انہوں نے 'صحیح لوگوں، صحیح پلیٹ فارم' اور سماجی کاموں کے لیے حقیقی معنوں میں پرعزم لوگوں کو مواقع فراہم کرنے کے لیے بی جے پی کی تعریف کی۔ انہوں نے کانگریس پر سماج کو ذات پات کی بنیاد پر تقسیم کرنے کا الزام لگایا۔
کرناٹک پردیش کانگریس کے ترجمان ایچ اے وینکٹیش نے ڈاکٹر گوڈا کے پارٹی چھوڑنے اور بی جے پی میں شامل ہونے پر تبصرہ کرتے ہوئے کہا کہ "ششروتا کے جانے سے میسور لوک سبھا حلقہ میں کانگریس پر کوئی اثر نہیں پڑے گا کیونکہ وہ پارٹی تنظیم میں سرگرم نہیں تھے۔"
یواین آئی، م ش