RegionalPosted at: Oct 30 2020 9:48AM کشمیر میں بی جے پی کے تین کارکنوں کی ہلاکت پروزیراعظم کا اظہارغم
سری نگر ، 30 اکتوبر (یواین آئی) وزیر اعظم نریندر مودی نے جموں و کشمیر کے ضلع کولگام میں عسکریت پسندوں کے ہاتھوں بھارتیہ جنتا پارٹی کے 3 کارکنوں کی ہلاکت پرتعزیت کرتے ہوئے ان کے کنبہ سے گہرے رنج وغم کا اظہار کیا ہے۔
جمعرات کےروز شام کے تقریباً 8 بجے کشمیر کے عسکریت پسندوں نے عید گاہ وائے کے پورہ علاقہ میں بی جے پی ضلع یوتھ کے جنرل سکریٹری فدا حسین یاٹو اوردودیگرکارکنان عمرراشد بیگ اورعمررمضان حزم پر فائرنگ کی جس کے نتیجے میں تینوں کارکن ہلاک ہوگئے۔ .
مسٹرمودی نے جمعرات کی رات دیر گئے ٹوئٹ کیا’’میں بی جے پی کے تین نوجوان کارکنوں کے قتل کی شدید مذمت کرتا ہوں۔ یہ تینوں بہت ہی بہترین کارکن تھے اور جموں و کشمیر میں عمدہ کام کر رہے تھے۔ اس مشکل گھڑی میں میں ان کے کنبہ سے تعزیت کا اظہار کرتا ہوں۔ ایشوران کی روح کو شانتی عطا فرمائے۔‘‘
جمعرات کو ایک پولیس افسر نے بتایا کہ بی جے پی کے ضلعی یوتھ جنرل سکریٹری فدا حسین یاٹو اوردو دیگر کارکنوں عمر راشد بیگ اور عمر رمضان حزم کو عسکریت پسندوں نے فائرنگ کر کے ہلاک کردیا جس میں تینوں افراد زخمی ہوگئے تھے۔ زخمی کارکنوں کو مقامی اسپتال میں داخل کرایا گیا جہاں انہیں مردہ قراردے دیا گیا۔
پولیس افسر نے بتایا کہ عسکریت پسند اندھیرے کا فائدہ اٹھا کر موقع سے فرار ہونے میں کامیاب ہوگئے۔ ان کی گرفتاری کے لئے سیکیورٹی فورسز نے علاقے میں سرچ آپریشن شروع کردیا ہے۔
انہوں نے کہا ’’پولیس نے تینوں کارکنوں کے قتل کے لئے متعلقہ دفعات کے تحت مقدمہ درج کرلیا ہے اور تفتیش شروع کردی گئی ہے‘‘۔
یواین آئی،اظ