NationalPosted at: Dec 6 2018 6:53PM اردو کونسل کی گورننگ باڈی کی تشکیل ’ ڈاکٹر شاہد اختر قومی اردو کونسل کے وائس چیئرمین نامزد
نئی دہلی، 6 دسمبر (یو این آئی) وزارت برائے فروغ انسانی وسائل حکومت ہندنے فروغ اردو کی سمت میں پہل کرتے ہوئے قومی کونسل برائے فروغ اردو زبان کی گورننگ کونسل کی تشکیل نو کرتے ہوئے جھارکھنڈ اسٹیٹ اقلیتی کمیشن کے سابق چیئرمین اور معروف سماجی کارکن ڈاکٹر شاہد اختر کو قومی اردو کونسل کا وائس چیئرمین بنایا ہے۔
قومی اردو کونسل کی جاری کردہ ریلیز کے مطابق وزارت فروغ انسانی وسائل نے آج قومی اردو کونسل کی گورننگ کونسل کی تشکیل کر دی ہے اور ڈاکٹر شاہد اختر کو قومی اردو کونسل کا وائس چیئرمین بنایا گیا ہے۔ڈاکٹر شاہد اختر نے رانچی یونیورسٹی سے ایل ایل بی، ایم بی اے اور پی ایچ ڈی کی ڈگریاں حاصل کی ہیں انھوں نے علی گڑھ مسلم یونیورسٹی سے بی ایس سی (کیمسٹری آنرس)، کی سند بھی حاصل کی تھی۔
ان کے علاوہ ارشد شیخ تلنگانہ، جاوید ملک، اقبال احمد خان کرناٹک، محترمہ شمع خان دہلی، ڈاکٹر نسیم احمد نسیم بتیا، ڈاکٹر قدسیہ قریشی دہلی،پروفیسر مظفر شہ میری کرنول، ڈاکٹر زاہد تماپوری بنگلورو، ڈاکٹر محمد ریاض احمد جموں، ایڈوکیٹ مصطفی خان ہوشنگ آبادمدھیہ پردیش، ڈاکٹر شبانہ اعظمی لکھنؤ، محمد التمش خان بھاگلپور، مولانا محمد ضیاء الحق اشرفی لوہردگاجھارکھنڈ، رفیق احمد گوہاٹی آسام، عبد السمیع بوبیرے ممبئی مہاراشٹر، محمد مظاہر خان مراد آباد، محمد فاروق شیخ ناگپور، سید شہزادی تلنگانہ اور سیدنصیب علی جموں کو گورننگ کونسل کا ممبر نامزد کیا گیا ہے۔
قومی اردو کونسل کے ڈائرکٹر ڈاکٹر شیخ عقیل احمد نے گورننگ کونسل کی تشکیل پراظہار مسرت کرتے ہوئے کہا کہ اب فروغ اردو کے کاموں میں تیزی آئے گی اور جلد ہی دیگر کمیٹیاں بھی تشکیل دی جائیں گی تاکہ مختلف اسکیموں کے حوالے سے جلد سے جلد فیصلے کیے جا سکیں۔
یو این آئی۔ ع ا۔