NationalPosted at: Jul 7 2020 8:04PM خود کشی کے بڑھتے واقعات، وکی پیڈیا سواستھا کی ذہنی صحت آگاہی مہم
نئی دہلی، بھارت، 7 جولائی [یو این آئی] گزشتہ دو تین ہفتوں کے دوران وکی پیڈیا پر خودکشی کے بارے میں مضامین پڑھنے والوں کی تعداد میں یک دم اضافہ ہوا ہے۔
حال ہی میں برطانوی میڈیکل جرنل کے ایک منظم جائزے میں خودکشی کی میڈیا رپورٹنگ اور اُس کے نتیجے میں کی جانے والی خودکشیوں کے درمیان انتہائی پریشان کن تعلق سامنے آیا ہے۔ جائزے میں یہ نتیجہ اخذ کیا گیا ہے کہ کسی سیلیبرٹی کی خودکشی کے بعد کے ایک سے دو مہینوں میں خودکشی کرنے والوں کی تعداد میں 8 تا 18 فیصد اضافہ ہوتا ہے۔
اسی سال 14 جون کو اداکار سُشانت سنگھ راجپوت کی موت کے بعد ہندستان میں وکی پیڈیا پر خودکشی کے متعلق مضامین پڑھنے والوں کی تعداد 200 فیصد بڑھ گئی اور سُشانت سنگھ کی موت کے بعد تین نوجوان پرستاروں نے بظاہر اُسی انداز میں خودکشی کر لی۔
اس کے پیش نظر ماہرین کے ایک گروپ اور وکی پیڈیا کمیونٹی نے ذہنی صحت آگاہی مہم کے تحت ہند نژاد زبانوں بشمول اردو میں ذہنی صحت اور ڈپریشن کے متعلق مضامین کے معیار کو بہتر سے بہتر بنانے کی ذمہ داری سنبھالی ہے۔
واضح رہے کہ ملک کے بڑے شہروں سے دور ذہنی صحت کے مسائل کے بارے میں بنیادی فہم کی اب بھی کمی ہے۔ اسی لیے خودکشی کا سوچنے والوں کی مدد کرنے یا پھر ذہنی صحت پر بات چیت کے سماجی کلنک کا مقابلہ کرنے کے لیے ہندستان کو ایک فعال ایجنڈے کی ضرورت ہے۔
وکی پیڈیا سواستھا کے ڈائریکٹر ابھیشیک سوریاونشی کے مطابق گوگل 'کے پی ایم جی' کے حالیہ سروے سے پتہ چلا ہے کہ 10 میں سے 9 افراد اپنی مقامی زبان میں فراہم کردہ معلومات پر اعتبار کرتے ہیں۔ انہوں نے اُمید ظاہر کی کہ ہند نژاد زبانوں میں قابلِ اعتبار معلومات تک جامع رسائی سے لوگ خودکشی جیسے انتہائی اقدام کے بجائے اپنی ذہنی حالت اور چیلنجوں کو بہتر سمجھنے اور صلاح لینے کو ترجیح دیں گے۔
خودکشی کے بارے میں حالیہ میڈیا رپورٹس نے ذہنی صحت کے چیلنجوں پر مباحثوں کو فروغ دیا ہے جبکہ خودکشی کے طریقوں پر مضامین کی آن لائن ٹریفک کئی گنا بڑھ گئی ہے۔
پراجیکٹ سواستھا کا مقصد تمام بھارتیوں کو صحت سے متعلق اہم معلومات تک آسان رسائی اُن کی مقامی زبان میں فراہم کرنا ہے۔ ذہنی صحت آگاہی مہم اِس موضوع سے منسلک بدنامی کا مقابلہ کرنے کے لیے قابلِ اعتبار اور مستند و معتبر معلومات فراہم کرنے کے ساتھ ساتھ ذہنی صحت کے بارے میں علم کے فروغ کی ایک کوشش ہے۔ وکی پیڈیا کے سواستھا پیج پر ذہنی صحت اور ڈپریشن کے بارے میں ہندی، کنڑ، تامل، اردو اور دیگر ہند نژاد زبانوں میں مضامین موجود ہیں جنہیں ذہنی صحت آگاہی مہم کے تحت بہتر بنانے کے لیے رضاکاروں کی ضرورت ہے۔
سواستھا مخفف ہے 'اسپیشل وکی پیڈیا اویئرنس اسکیم فار دی مینٹل ہیلتھ کیئر ایفی لیئٹس" کا۔ اس کی فعال کوششوں سے کورونا کی وبا کے دوران گزشتہ چند مہینوں میں اُن بھارتیوں کو صحت کے متعلق معلومات حاصل کرنے میں مدد ملی ہے جو انگریزی زبان نہیں جانتے۔ یہ معلومات اُنہیں 10 ہند نژاد زبانوں میں فراہم کی گئی ہے۔ اس طرح لوگ ہندستان میں کورونا وبا کے بارے میں وکی پیڈیا کا مضمون اپنی مادری زبان میں پڑھ سکتے ہیں۔ اس صفحے کو روزانہ اوسطً 2 لاکھ مرتبہ وزٹ کیا جا رہا ہے۔
یو این آئی۔ سلام