نئی دہلی، 19 اپریل (یو این آئی) مرکزی وزیر داخلہ امت شاہ نے جمعہ کو لوگوں سے اپیل کی کہ وہ لوک سبھا انتخابات کے پہلے مرحلے میں ملک کی ترقی، سلامتی، اتحاد اور خودمختاری کے لیے بڑی تعداد میں ووٹ دیں۔
سوشل میڈیا پر پوسٹس کی ایک سیریز میں اروناچل پردیش کے لوگوں سے اپیل کرتے ہوئے مسٹر شاہ نے کہا "اروناچل پردیش آج اسمبلی انتخابات اور لوک سبھا انتخابات کے پہلے مرحلے کی ووٹنگ کی میزبانی کرنے جا رہا ہے۔ میں عوام سے اپیل کرتا ہوں کہ وہ ایسی حکومت کو منتخب کریں جو ریاست کی ترقی کو تیز کرے اور ملک کے اتحاد اور خودمختاری کو یقینی بنائے۔
انہوں نے سکم کے لوگوں پر زور دیا کہ وہ ایسی پارٹی کو ووٹ دیں جو ریاست کو معاشی طور پر مضبوط بنائے اور لوگوں کے مسائل حل کرے۔
وزیر داخلہ نے کہا 'لوک سبھا انتخابات کے پہلے مرحلے کے ساتھ ساتھ آج سکم میں اسمبلی انتخابات بھی ہو رہے ہیں۔ میں لوگوں سے اپیل کرتا ہوں کہ وہ ایسی حکومت کے لئے ووٹ دیں جو ریاست کو معاشی طور پر مضبوط کرنے اور لوگوں کے مسائل کو حل کرنے کے لیے بہتر سماجی اور جسمانی ڈھانچے کی تعمیر کے لیے پرعزم ہو۔
مسٹر شاہ نے میزورم، میگھالیہ، منی پور اور ناگالینڈ کے لوگوں سے اپیل کی کہ وہ بڑی تعداد میں گھروں سے باہر آئیں اور ایسی حکومت بنانے کے لئے ووٹ دیں جو ریاست کے امن کے لیے پرعزم ہو۔
انہوں نے کہا "جب کہ میزورم، میگھالیہ، منی پور اور ناگالینڈ آج لوک سبھا انتخابات کے پہلے مرحلے میں ووٹ ڈال رہے ہیں، میں ان ریاستوں کی بہنوں اور بھائیوں سے اپیل کرتا ہوں کہ وہ بڑی تعداد میں ووٹ ڈالیں اور شمال مشرق کے بنیادی ڈھانچے کی ترقی کی حمایت کریں ۔ انسانی وسائل کی ترقی اور امن کے لیے پرعزم حکومت کو ووٹ دینے کی لوگوں سے اپیل کریں ۔
ایک دیگر پوسٹ میں مسٹر شاہ نے کہا "لوک سبھا انتخابات کے پہلے مرحلے میں انڈمان اور نکوبار جزائر اور لکشدیپ میں ووٹنگ ہو رہی ہے۔ میں لوگوں سے اپیل کرتا ہوں کہ وہ ایسی حکومت کے لئے ووٹ دیں جو سیاحت کی صلاحیت، بنیادی ڈھانچے کی ترقی اور سیکورٹی کو بڑھا کر مرکز کے زیر انتظام علاقے کی ترقی اور خوشحالی کے لیے پرعزم ہو۔
خیال رہے کہ 21 ریاستوں اور مرکز کے زیر انتظام علاقوں کی 102 پارلیمانی نشستوں کے لیے پہلے مرحلے کی ووٹنگ صبح شروع ہوئی۔ اس مرحلے میں 1625 امیدواروں کی قسمت کا فیصلہ آج الیکٹرانک ووٹنگ مشین میں بند ہوگا اور ان کی قسمت 4 جون کو کھلے گی۔
یو این آئی ۔ ع خ