نئی دہلی، 19 اپریل (یو این آئی) رمضان کے مواسات اور مواخاۃ کو عیدالفطر کا تسلسل قرار دیتے ہوئے جماعت اسلامی ہند کے امیر سید سعادت اللہ حسینی نے کہا کہ عید کا پیغام یہی ہے کہ ہم سب مساوی اور برابر ہیں ایک ہی خالق کے مخلوق ہیں اور یہاں سب کو یکساں حقوق حاصل ہیں۔ یہ بات انہوں نے گزشتہ دیر شام جماعت اسلامی ہند کے عید ڈنر تقریب سے مختصر خطاب کرتے ہوئے کہی انہوں نے کہاکہ رمضان میں جس طرح ہم نے لوگوں کی تکلیف، بھوک پیاس کو محسوس کیا اسے ملسل طور پر کرنا چاہئے، خدا رمضان کے حوالے سے ہمیں دوسرے کی بھوک و پیاس کا احساس کرایا اور مساوات اور مواخاۃ درس دیا اسے ہمیشہ مسلسل یاد رکھنا چاہئے۔ انہوں نے کہاکہ عیدکا پیغام یہی ہے کہ ہم سب برابر ہیں، ہمارے حقوق یکساں ہیں اور ہم ایک ہی خالق کے مخلوق ہیں۔انہوں نے کہاکہ عید کے موقع پر جس طرح کندھے سے کندھا ملا کر اس بات کا اعلان کرتے ہیں ہمیں مل جل کر رہنا ہے، بھائی بھائی بن کر رہنا ہے۔ اس طرح مساوات اور مواخاۃ کا عہد کرتے ہیں۔ انہوں نے کہا کہ جس طرح ہم عیدسے قبل سماج کے محروم طبقہ اور مسکین لوگوں کا خیال رکھتے ہیں، یہ کام ہمیں سال بھر کرنا چاہئے۔ یہی عید کا حقیقی پیغام ہے۔
سید سعادت اللہ حسینی نے کہاکہ اس ملک میں سب کو یکساں طور پر حقوق ملے اس ضمن میں ہمیں کوشش کرنی چاہئے۔ انہوں نے کہاکہ خاص طور پر جو لوگ ستائے جارہے ان کی مدد کرنے اور ان کے ساتھ کھڑے ہونے کی ضرورت ہے۔ ساتھ ہی انہوں نے کہاکہ ہمیں اس ملک کو امن کا گہوارہ بنانے کی بھی کوشش کرنی چاہئے۔انہوں نے کہاکہ اس ملک میں سب کو برابری کا حقوق ملے، سب کو انصاف ملے اور سب کو سکون کے ساتھ رہنے کا موقع میسر ہو، اس کے لئے جدوجہد کررہے ہیں اور آگے بھی کرتے رہیں گے۔
امیرجماعت اسلامی ہند نے اس موقع پر فلسطینی عوام کو یاد کرتے ہوئے کہاکہ وہ مسلسل ستائے جارہے ہیں، انہیں پریشان کیا جارہا ہے، وہ شہید کئے جارہے ہیں۔انہیں بدترین ظلم کا نشانہ بنائے جارہے ہیں۔ انہوں نے کہاکہ اس موقع پر ان کے درد کو بھی محسوس کرنے کی ضرورت ہے۔انہوں نے کہاکہ جس طرح ماضی میں آپ کا تعاون ہمیشہ حاصل رہا ہے اسی طرح مستقبل میں یہ تعاون حاصل رہے گا۔
تقریب کے اہم شرکاء میں ایران اور دیگر ممالک کے سفارت کار،جماعت اسلامی کے انجینئر سلیم احمد، زکوۃ فاؤنڈیشن کے چیرمین ڈاکٹر ظفر محمود، آل انڈیا جمعیۃ اہل حدیث کے امیر مولانا اصغر مام مہدی سلفی، رکن پارلیمنٹ کمال احمد، نئی دینا کے مدیر شاہد صدیقی اور دیگر معززین شامل تھے۔
یو این آئی۔ ع ا۔