مانڈیا (کرناٹک)، 17 اپریل (یو این آئی) کانگریس کے رکن پارلیمنٹ راہل گاندھی نے بدھ کو مانڈیا میں بے روزگاری سے نمٹنے کے مقصد سے پارٹی کی نئی پہل کا انکشاف کیا اور 'پہلی نوکری پکی' گارنٹی نامی ایک نئی اسکیم شروع کرنے کا اعلان کیا مسٹر گاندھی نے یہاں ایک جلسہ عام سے خطاب کرتے ہوئے یہ اعلان کیا۔ انہوں نے کہا، 'میں یہاں آپ کو بتانے آیا ہوں کہ کانگریس پارٹی آپ کے لیے تاریخی کام کرنے کے لیے پرعزم ہے۔ ہماری "پہلی نوکری پکی" اسکیم کے ذریعے، ہم بے روزگار ڈپلومہ ہولڈرز اور کالج گریجویٹس کو ان کی پہلی نوکری کا حق فراہم کریں گے۔
انہوں نے لوک سبھا انتخابات سے قبل نئی روزگار اسکیم کا انکشاف کرتے ہوئے قرض معافی کے بارے میں وزیر اعظم نریندر مودی کے نقطہ نظر پر تنقید کی۔ انہوں نے اس بات پر روشنی ڈالی کہ مسٹر مودی نے ملک کے 25 امیر ترین لوگوں کے 16 لاکھ کروڑ روپے کے قرض معاف کر دیے ہیں۔ کانگریس لیڈر نے کہا کہ یہ چونکا دینے والی رقم مہاتما گاندھی نیشنل رورل ایمپلائمنٹ گارنٹی ایکٹ (منریگا) کے 24 سال کے لیے مختص رقم کے برابر ہے۔
مسٹر گاندھی نے کہا کہ قرض معافی میں عدم مساوات نے کسانوں میں تشویش پیدا کردی ہے، جو سوال کرتے ہیں کہ انہیں مساوی فوائد کیوں نہیں مل رہے ہیں۔ انہوں نے کسان برادری کے ساتھ منصفانہ سلوک اور تعاون کی ضرورت پر زور دیا۔
یواین آئی۔الف الف