امپھال، 26 اپریل (یو این آئی) منی پور کی باہری سیٹ کے لیے آٹھ اضلاع میں آج صبح سات بجے سے ووٹنگ شروع ہو گئی۔ ابھی تک کوئی ناخوشگوار واقعہ پیش نہیں آیا اور ووٹنگ پرامن طریقے سے جاری ہے۔
موسم صاف نہ ہونے کے باوجود لوگ صبح 7 بجے سے پہلے ہی پولنگ اسٹیشنز کے باہر قطاروں میں کھڑے دیکھے گئے۔ ووٹنگ شام 4 بجے تک جاری رہے گی۔
ریاست کے آٹھ اضلاع اکھرول، کامجونگ، تمنگلونگ، نونی، سینا پتی، جیریبام، فیرزوال اور ٹینگنوپل کے 13 اسمبلی حلقوں میں آج ووٹنگ ہو رہی ہے، جس میں کل 4,84,949 ووٹرز ہیں، جن میں 2,39,140 مرد، 2,45,807 خواتین اور دو ٹرانس جینڈر ووٹرز سمیت مجموعی طور پر 4,84,949 رائے دہندگان حق رائے دہی کا استعمال کریں گے۔
کل 848 پولنگ اسٹیشنز ہیں جن میں سے 202 کا انتظام مکمل طور پر خواتین اہلکار کے ذریعہ کیا جائے گا۔ ان پولنگ اسٹیشنوں کے لیے ویب کاسٹنگ/ویڈیو گرافی کے انتظامات کیے گئے ہیں۔ 4,000 ریاستی مسلح اہلکاروں کے علاوہ، سی اے پی ایف کی تقریباً 87 کمپنیاں پولنگ اسٹیشنوں پر تعینات کی گئی ہیں۔
یواین آئی۔ م س