RegionalPosted at: Apr 19 2024 10:22AM اتر پردیش کی آٹھ سیٹوں پر ووٹنگ شروع
لکھنؤ، 19 اپریل (یو این آئی) لوک سبھا انتخابات کے پہلے مرحلے کے لئے سخت حفاظتی انتظامات کے درمیان مغربی اتر پردیش کے نو اضلاع کی آٹھ سیٹوں پر جمعہ کی صبح سات بجے ووٹنگ شروع ہو گئی۔
ریاست کے چیف الیکٹورل آفیسر نودیپ رِنوا نے جمعرات کو بتایا کہ سہارنپور، کیرانہ، مظفر نگر، بجنور، نگینہ، مراد آباد، رام پور اور پیلی بھیت میں صبح سات بجے ووٹنگ شروع ہو گئی ہے اور شام چھ بجے تک جاری رہے گی۔ مقررہ وقت کے بعد بھی قطار میں کھڑے ووٹرز کو ووٹ ڈالنے کا حق دیا جائے گا۔
ان حلقوں میں 73 مرد اور 7 خواتین سمیت کل 80 امیدوار میدان میں ہیں، جن کی قسمت کا فیصلہ 1 کروڑ 43 لاکھ ووٹرز کریں گے، جن میں 76.23 لاکھ مرد اور 67.14 لاکھ خواتین ووٹرز شامل ہیں۔
یو این آئی۔ این یو۔