RegionalPosted at: Apr 26 2024 10:14AM یوپی کی آٹھ سیٹوں پر ووٹنگ شروع
لکھنؤ، 26 اپریل، (یو این آئی) لوک سبھا انتخابات کے دوسرے مرحلے میں سخت حفاظتی انتظامات کے درمیان جمعہ کی صبح سات بجے اتر پردیش کے نو اضلاع کی آٹھ لوک سبھا سیٹوں کے لئے ووٹنگ شروع ہو گئی۔
ریاست کے چیف الیکٹورل آفیسر نودیپ رِنوا نے جمعرات کو صحافیوں کو بتایا کہ انتخابات کے دوسرے مرحلے میں نو اضلاع کی آٹھ لوک سبھا حلقوں امروہہ، غازی آباد، میرٹھ، باغپت، علی گڑھ، متھرا، بلند شہر اور گوتم بدھ نگر میں مقررہ وقت کے مطابق صبح سات بجے ووٹنگ شروع ہوگی۔ ووٹنگ شام 6 بجے تک جاری رہے گی جبکہ ووٹوں کی گنتی 4 جون کو ہوگی۔
انتخابات کے اس مرحلے میں فلم اداکارہ اور بی جے پی ایم پی ہیما مالنی اور ارون گوول سمیت 91 امیدواروں کی قسمت کا فیصلہ ہوگا۔
مسٹر رنوا نے کہا کہ دوسرے مرحلے میں 81 مرد اور 10 خواتین امیدوار میدان میں ہیں، جن کی قسمت کا فیصلہ 1 کروڑ 67 لاکھ 77 ہزار 198 ووٹرز کریں گے، جن میں 90 لاکھ 26 ہزار 51 مرد اور 77 لاکھ 50 ہزار 356 خواتین کے علاوہ 791 تھرڈ جینڈر شامل ہیں۔ آزادانہ، منصفانہ اور پرامن ووٹنگ کے لیے تمام تیاریاں مکمل کر لی گئی ہیں۔ دوسرے مرحلے میں سب سے زیادہ ووٹروں کی تعداد غازی آباد میں 29 لاکھ 45 ہزار 487 ہے جبکہ سب سے کم ووٹروں کی تعداد باغپت میں 16 لاکھ 53 ہزار 146 ہے۔
متھرا اور گوتم بدھ نگر میں زیادہ سے زیادہ 15-15 امیدوار میدان میں ہیں جبکہ بلند شہر میں کم از کم چھ امیدواروں کی قسمت کا فیصلہ ہوگا۔ اس الیکشن میں کل ایک لاکھ 77 ہزار چار پولنگ اسٹیشنز اور سات ہزار 797 پولنگ اسٹیشن بنائے گئے ہیں جن میں سے تین ہزار 472 حساس ہیں۔
یواین آئی۔ م س