میڈرڈ، 12 نومبر (اسپوتنك) اسپین کی اعتدال پسند سٹیزن پارٹی کے لیڈر البرٹ رویرا نے عام انتخابات میں شکست کے بعد پیر کو اپنے عہدے سے استعفی دے دیا۔
اسپین کی میڈیا نے اس کی اطلاع دی۔ پارٹی کو اتوار کو ہونے والے انتخابات میں صرف 10 سیٹیں ملیں اور اسے 47 سیٹوں کا نقصان ہوا ہے۔ اعتدال پسند پارٹی 10 نشستوں کے ساتھ چھٹے نمبر پر ہے۔
مقامی میڈیا کے مطابق مسٹر رویرا نے تسلیم کیا کہ انتخابات میں پارٹی کی کارکردگی انتہائی خراب رہی اور اس کے لئے ان کے پاس کوئی عذر نہیں ہے۔ انہوں نے کہا کہ اس سال اپریل میں ہوئے انتخابات میں تقریبا 40 لاکھ افراد نے ان کی پارٹی کو ووٹ دیا تھا لیکن اس بار صرف 16 لاکھ لوگوں نے ہی ان کے حق میں ووٹ دیا۔
مسٹر رویرا نے کہا کہ اسپین کے عوام نے ان کی پارٹی کو مسترد کردیا اور اپنی پارٹی کی خراب کارکردگی کے لئے براہ راست طور پر وہ خود ذمہ دار ہیں۔ قابل ذکر ہے کہ پارٹی کی تشکیل 2006 میں ہوئی تھی اور پارٹی کے قیام سے ہی مسٹر رویرا پارٹی کے لیڈر بنے ہوئے تھے۔
خیال رہے اتوار کو اسپین میں عام انتخابات ہوئے تھے۔ اسپین میں گزشتہ چار برسوں میں چوتھی بار الیکشن ہوئے ہیں۔ انتخابات کے بعد ووٹوں کی گنتی میں پی ایس او ای پارٹی کو 120 سیٹیں ملی جبکہ کنزرویٹو پیپلزپارٹی نے 88 سیٹوں پر جیت درج کی۔ ووکس پارٹی نے 52 اور بائیں بازو کی حمایت یافتہ يونیڈاس پوجےموس کو 35 سیٹوں میں کامیابی حاصل ہوئی۔
اسپوتنک،اظ