NationalPosted at: Sep 12 2018 8:17PM دہلی امبارکیشن پوائنٹ پر حج مشن مکمل
رضاکارانہ خدمات انجام دینے والی تنظیموں،حکومتی ایجنسیوں کے کام کو مومنٹو اور سند دیکر سراہا گیا،کامیاب رہا حج 2018:عرفان احمد
نئی دہلی، 12ستمبر(یو این آئی)حج 2018کے لئے دہلی امبارکیشن پوائنٹ سے مکہ مکرمہ اور مدینہ منورہ کا سفر کرنے والے حجاج کرام کی وطن واپسی کا سلسلہ حج مکمل ہونے کے بعد سے ہی جاری ہے۔کل دہلی امبارکیشن پوائنٹ کے حج ٹرمنل پر حج کمیٹی کے ذمہ داران اور رضاکارانہ تنظیموں نے دہلی امبارکیشن پوائنٹ سے سفر کر نے والے حجاج کرام کے آخری قافلہ کا استقبال کیااور اس طرح اس پوائنٹ پر حج 2018مشن بخیر و خوبی مکمل ہوا۔آخری قافلہ کی وطن واپسی کے ساتھ ہی دہلی ائر پورٹ پر حج امور میں رضاکارانہ خدمات انجام دینے والی غیر سرکاری تنظیموں ،حکومتی ایجنسیوں اور دیگر رضاکاروں کی خدمات کو سراہنے کے لئے ان کے اعزاز میں ایک شاندار تقریب منعقد کی گئی جس کے مہمان خصوصی ڈاکٹر اشوک تیاگی تھے جبکہ صدارت حج کمیٹی آف انڈیا کے ممبر اور دہلی امبارکیشن پوائنٹ کے کو آرڈینیٹر عرفان احمد نے کی۔
عرفان احمد نییہاں جاری ایک پریس ریلیز میں بتایا کہ گزشتہ برسوں کی طرح اس سال بھی دہلی امبارکیشن پوائنٹ پر حجاج کی سہولت کے لئے بہتر انتظامات کئے گئے تھے اور حاجیوں کو اپنے سفر کے دوران کسی طرح کی مشکلات کا سامنا نہ کرنا پڑے اس کا پورا خیال رکھا گیا تھا۔
انہوں نے کہا کہ الحمدللہ ہمیں کسی طرح کی کوئی شکایت حاجیوں سے موصول نہیں ہوئی ہے اور نہ ہی کسی حاجی کے سامان گم ہونے کی اطلاع ہے۔
انہوں نے بتایا کہ حج مشن کے انتظامات میں جہاں مرکزی حج کمیٹی اور وزارت اقلیتی امور کے انتظامات کے ذریعہ حجاج کرام کی خدمت کرنے میں سہولت ہوتی ہے وہیں بہت بڑا تعاون حکومت کی دیگر ایجنسیوں سے بھی حج کمیٹی کو ملتا ہے ۔
انہوں نے بتایا کہ ان ایجنسیوں میں ائر پورٹ پر سیکیورٹی سے لیکر حاجیوں کی فلائٹ اور دیگر سہولیات بہم پہونچانے میں دہلی پولیس،جی ایم آر،سی آئی ایس ایف،کسٹم،امیگریشن اور ڈائل جیسی ایجنسیوں کا بھر پور تعاون ہمیں ملتا ہے ،اسی کے ساتھ حاجیوں کی سہولیات اور ان کی خدمات میں رضاکارانہ تعاون کرنے والی غیر سرکاری تنظیمیں بھی پیش پیش رہتی ہیں جن کا ہم نیہ صرف شکریہ ادا کرتے ہیں بلکہ ان کی خدمات کو دل سے سلام پیش کرتے ہیں۔
عرفان احمد نے خصوصیت کے ساتھ مرکزی اقلیتی امور کے وزیر مختار عباس نقوی کی حج مشن میں خصوصی دلچسپی اور تعاون کا ذکر کرتے ہوئے کہا کہ وزیر موصوف کی ذاتی محنت اور لگن کی وجہ سے حج مشن انجام دینے میں ہمیں خصوصی تعاون ملتا ہے اور اسی وجہ سے سال در سال حج انتظامات بہتر ہوتے جارہے ہیں۔غور طلب ہے کہ اس تقریب کے موقع پر حج مشن میں تعاون دینے والی تنظیموں اور ایجنسیوں کی خدمات کی تعریف میں تقریبا 300توصیفی سند اور مومنٹو پیش کئے گئے ۔
تقریب کے موقع پر جن اہم شخصئیات کی شرکت رہی ان میں طارق کمال،پالن کپ،ہیمنت گلاٹی،پوجا پنج،دنیش جی،ڈاکٹر انیس،ڈی سی کسٹم مشراجی،اے ایف آر آر او پی کے جھا،شان عالم،جمیل ملک،صابر سیفی ڈاکٹر زینت جمال انساری،سرفراز علی،احسان خان اور دلشاد احمد کے نام قابل ذکر ہیں اس موقع پر حج کمیٹی آف انڈیا کے لئے میڈیا خدمات انجام دینے کے لئے عبد الباسط کو بھی مومنٹو اور توصیفی سند دیکر ہمت افزائی کی گئی ۔
یو این آئی۔ سلام۔م الف