نئی دہلی، 15 جنوری (یو این آئی) بری فوج کے سربراہ جنرل بپن راوت نے ہمسایہ ملک پاکستان کو سخت وارننگ دیتے ہوئے آج کہا کہ فوج، کسی بھی دہشت گردانہ حرکت کے جواب میں سخت کاروائی کرنے میں جھجھک محسوس نہیں کرے گی ۔
جنرل راوت نے 71 ویں یوم افواج پر آج یہاں کری یپَّا پریڈ گراؤنٖڈ میں شاندار پریڈ کی سلامی لینے کے بعد کہا کہ جموں و کشمیر میں لائن آف کنٹرول (ایل او سی) پر سرحد پار سے جنگ بندی کی خلاف ورزی ہو رہی ہے لیکن فوج اس کا منھ توڑ جواب بھی دے رہی ہے اور ایل او سی پر ہندوستانی فوج کا دبدبہ ہے۔
انہوں نے کہا کہ اس میں کوئی شبہ نہیں کہ مغرب میں ہمارا پڑوسی دہشت گردی کو بڑھاوا دے رہا ہے اور دہشت گردوں کو ہتھیار بھی فراہم کروا رہا ہے۔ انہوں نے کہا کہ فوج دہشت گردی کو قطعی برداشت نہیں کرے گی اور اس طرح کی سرگرمیوں کے جواب میں سخت کاروائی کی جائے گی۔
انہوں نے کہا کہ جموں و کشمیر میں بھی فوج، ملک اور عوام کی حفاظت کے ساتھ کوئی سمجھوتہ نہیں کرے گی۔ فوج نے ہر ناپاک حرکت کے جواب میں دہشت گردوں کو زبردست نقصان پہنچایا ہے۔
انہوں نے کہا کہ وادی کے معصوم اورناسمجھ نو جوانوں کو بھڑکا کر انھیں تشدد پسندی کی جال میں پھنسایا جا رہا ہے۔ اس سے مقامی لوگوں کا ہی نقصان ہو رہا ہے اور دہشت گردی انھیں اندھے کوئیں میں ڈھکیل رہی ہے۔ انہوں نے کہا فوج اور دیگر سکیورٹی دستوں نے ریاست میں پنچایت الیکشن اور امرناتھ یاترا ،پرامن ڈھنگ سے منعقد کرواکر عوام کی حفاظت کے تئیں اپنے پابند عہد ہونے کا پختہ ثبوت دیا ہے۔
جاری....یو این آئی، ایم اے۔