کلکتہ 15مئی (یو این آئی)الیکشن کمیشن کے ذریعہ مغربی بنگال میں ایک دن قبل انتخابی مہم کو ختم کیے جانے اور دو اعلیٰ افسران کے تبادلے پر سخت اعتراض کرتے ہوئے وزیر اعلیٰ ممتا بنرجی نے کہا کہ الیکشن کمیشن جانبداری سے کام کررہا ہے۔کمیشن کا یہ فیصلہ غیر جمہوری اور غیر آئینی ہے اور بی جے پی کے اشارہ پر اٹھایا گیا ہے قدم ہے۔
آج رات پریس کانفرنس سے خطاب کرتے ہوئے ممتا بنرجی نے کہا کہ الیکشن کمیشن اپنی معتربیت کو کھودیا ہے۔یہی وجہ ہے کہ وہ ایک سیاسی جماعت کے اشارے پر کام کررہا ہےاور بی جے پی کو فائدہ پہنچانے کیلئے بنگال میں کام کررہا ہے۔انہوں نے کہا کہ بنگال میں چوں کہ کل ہی مودی کی ریلی ہے اس لیے الیکشن کمیشن نے ایک دن قبل ہی انتخابی مہم کو ختم کرنے کا اعلان کردیا ہے۔اگر مودی کی ریلی آخری دن ہوتا تو شاید الیکشن کمیشن یہ قدم نہیں اٹھا تا۔
ممتا بنرجی نے کہا کہ الیکشن کمیشن نے دو ریٹائرڈ افسروں کے ذریعہ بنگال کو کنٹرول کرنے کی کوشش کی ہے۔بہار، اترپردیش میں تمام بوتھوں پر مرکزی فورسیز کی تعیناتی کیوں نہیں کی گئی ہے۔صرف بنگال میں ہی کیوں،انہوں نے کہا کہ الیکشن کمیشن مودی کے اشارے پر بنگال کو بدنام کرنے کی کوشش کررہی ہے۔وزیرا علیٰ نے کہا کہ ملک میں کوئی پہلی مرتبہ انتخاب نہیں ہورہا ہے مگر اس مرتبہ الیکشن کمیشن اس طرح جانبداری سے کیوں کام کررہا ہے۔ہم الیکشن کمیشن کی عزت کرتے ہیں مگر کمیشن کی جانبداری پر خاموش نہیں رہ سکتے ہیں۔ممتا بنرجی نے کہا کہ الیکشن کمیشن ریاست کے افسران کو دھمکی دی کہ وہ دیکھ لیں گے۔یقینا الیکشن کے زمانے میں افسران کمیشن کے ماتحت ہوتے ہیں مگر ریاست بھی کام کرتی ہے۔
ممتا بنرجی نے کہا کہ الیکشن کمیشن نے مودی، شاہ اور بی جے پی لیڈروں کے خلاف کارروائی نہیں کی ہے، کیوں کہ دراصل مودی کے دور حکومت میں ملک کے تمام جمہوری اور آئینی ادارے خطرے میں ہیں۔بنگال کے عوام خطرات محسوس کررہے ہیں۔
جاری۔ یواین آئی۔نور۔ ع ا۔