ممبئی، 14 جولائی (یو این آئی) عالمی سطح پر کورونا وائرس کے کیسز میں اضافہ ہونے کے ساتھ ہی گھریلو سطح پر اس کے تیزی سے پھیلاؤ کو روکنے کے لیے کلیدی آئی ٹی ہب بنگلور کے ساتھ ہی پورے بہار میں اور کئی دیگر ریاستوں میں ضلعی سطح پر لاک ڈاؤن کے نفاذ سے مایوس سرمایہ کاروں کی فروخت کا اثر منگل کے روز شیئر بازار پر نظر آیا جس سے بی ایس ای کا سنسیکس 660.63 پوائنٹس اور نیشنل اسٹاک ایکسچینج (این ایس ای) کا نفٹی 195.35 پوائنٹس کم ہو گیا۔
بی ایس ای میں اس کے ساتھ ہی تیزی پر بریک لگ گیا۔ بی ایس ای سنسیکس 660.63 پوائنٹس کی کمی سے 36033.06 پوائنٹس اور این ایس ای کا نفٹی 195.35 پوائنٹس کی کمی سے 10607.35 پوائنٹس پر بند ہوا۔ اس کمی کا اثر چھوٹی اور درمیانے درجے کی کمپنیوں پر بھی ظاہر ہوا جہاں بی ایس ای کا مڈ کیپ 0.95 فیصد گر کر 13276.60 پوائنٹس اور اسمال کیپ 0.93 فیصد کم ہو کر 12665.18 پوائنٹس پر آگیا۔
بی ایس ای میں ٹیلی کام 0.04 فیصد اور ہیلتھ کیئر 0.01 فیصد کے سوا باقی تمام گروپس نقصان میں رہے جس میں بینکنگ 3.06 فیصد، فائینانس 2.56 فیصد اور دھاتیں 2.49 فیصد تھیں۔ بی ایس ای میں مجموعی طور پر 2805 کمپنیوں میں کاروبار ہوا جن میں سے 1854 نقصان اور 831 اضافے میں رہے جبکہ 120 میں کوئی تبدیلی نہیں ہوئی۔
عالمی سطح پر کورونا متاثرین کی تعداد میں اضافے کا اثر دیکھا گیا جس سے تمام بڑے انڈیکس سرخ نشان میں رہے۔ برطانیہ کا ایف ٹی ایس ای 0.21 فیصد ، جرمنی کا ڈیکس 1.44 فیصد، ہانگ کانگ کا ہینگ سینگ 1.14 فیصد، جاپان کا نکئی 0.87 فیصد اور چین کا شنگھائی کمپوزٹ 0.83 فیصد رہا۔
یو این آئی، ایم اے۔