نئی دہلی، 19 مئی (یو این آئی) دہلی کانگریس کے سکریٹری اور سپریم کورٹ کے وکیل سرفراز احمد صدیقی نے مختلف نیوز چینلوں پر آنے والے ایگزٹ پول کو ایک مذاق قرار دیتے ہوئے کہاکہ مرکز میں قومی ترقی پسند اتحاد ہی حکومت بنائے گی۔
انہوں نے دعوی کیاکہ جس طرح نیوز چینلوں نے بی جے پی کے حق میں ایگزٹ پول دکھائے ہیں اس سے محسوس ہوتا ہے کہ یہ سارے ایگزٹ پول بی جے پی دفتر میں بیٹھ کر بنائے گئے ہیں۔ انہوں نے کہاکہ بی جے پی کے خلاف عوام میں نفرت ہے، ناراضگی ہے اور عوام سے نوٹ کی منسوخی اور جی ایس ٹی سے پریشان ہیں۔ اس لئے ایسے میں بی جے پی کے اقتدارمیں واپس آنے کا امکان نہیں ہے۔
انہوں نے کہاکہ خاص طور پر ان ریاستوں میں بی جے پی کو کافی آگے دکھایاگیا ہے جہاں حال ہی کانگریس نے بی جے پی کو اسمبلی انتخابات میں شکست دی ہے۔ انہوں نے الزام لگایا کہ اس طرح کے ایگزٹ پول کا مقصد جہاں بی جے پی کے لئے ووٹوں کی گنتی میں دھاندلی کا راستہ ہموار کرنا ہے وہیں الیکشن کمیشن کی خامیوں اور بی جے پی کے تئیں اس کے جھکاو سے عوام کی توجہ ہٹانا ہے۔
انہوں نے دعوی کیا کہ پورا انتخاب کو لوگوں نے دیکھا ہے اور الیکشن کمیشن کی ای وی ایم کے تئیں لاپروائی اور اپوزیشن اراکین اس کا امتیاز کسی سے ڈھکا چھپا نہیں رہ گیا ہے۔ انہوں نے کہاکہ یہ ملک کا سب سے امتیاز برتنے والا اور سرکاری مشنری کو حکمراں پارٹی کے حق میں استعمال کرنے والا انتخاب تھا۔ انہوں نے کہاکہ اگر جمہوریت پسند میں اس کے تئیں بیدار نہیں ہوئے تو اس کی بھاری قیمت چکانی ہوگی۔
یو این آئی۔ ع ا۔