پنجی(گوا)22جنوری (یواین آئی )مرکزی وزیر اطلاعات و نشریات ایم وینکیا نائیڈو نے اے پی میں پیش آئے ٹرین حادثہ پر صدمہ کا اظہار کیا ۔ انہوں نے گوا کے پنجی میں میڈیا سے بات کرتے ہوئے کہا کہ ملک بھر میں ٹرین کی پٹریوں کو مستحکم کرنے کی ضرورت ہے ۔ ریلوے کی سلامتی وزارت ریلوے کا ایجنڈہ ہے ۔ انہوں نے اس یقین کا اظہار کیاکہ وزیر ریلوے سریش پربھو اس سمت کام کریں گے ۔ وینکیا نائیڈو نے اس حادثہ میں مرنے والے افراد کے غم زدہ ارکان خاندان کو پرسہ بھی دیا ۔ انہوں نے کہا کہ حادثہ کی اطلاع ملتے ہی وشاکھا پٹنم ڈی آر ایم سے بات کرتے ہوئے صورتحال کی تفصیلات حاصل کیں ۔ زیادہ تر زخمیوں کا تعلق اوڈیشہ سے ہے ۔ اوڈیشہ کے وزیر اعلی نوین پٹنائک سے بھی بات کی اور ان سے خواہش کی کہ حادثہ کے مقام پر اضافی فورس بھیجے تاکہ زخمیوں کو رائے گڑھ کے اسپتال منتقل کیا جاسکے جس پر نوین پٹنائک نے مثبت ردعمل ظاہر کیا اور مناسب اقدامات کی یقین دہانی کرائی ۔ وزیر موصوف نے کہا کہ انہوں نے اپنے کابینی ہم منصب دھرمیندر پردھان سے بھی بات کی جن کا تعلق اوڈیشہ سے ہے۔ دھرمیندر پردھان نے دیگر حکام سے بھی اس سلسلہ میں ربط پیدا کیا۔ وینکیا نائیڈو نے کہا کہ وشاکھا پٹنم کے رکن پارلیمنٹ ڈاکٹر ہری بابو سے بھی انہوں نے تفصیلات حاصل کیں جنہوں نے تجویز پیش کی کہ بعض مریضوں کو وشاکھا پٹنم کے کنگ جارج اسپتال منتقل کیا ۔ انہو ں نے کہا کہ پھنسے ہوئے افراد کو نکالنے کیلئے خصوصی احتیاط کی ضرورت ہے ان کو غذا اور پانی کی فراہمی کو بھی یقینی بنایا جائے گا ۔ یواین آئی۔ وخ۔ ایف اے۔ این یو۔